Habakouk 2 - Labib An Kreol Seselwa

Bondye I Reponn Habakouk

¹ Mon pou reste dan mon plas koman santinel; mon pou debout lo miray pour gete ki Bondye pou dir mwan. Ki i pou reponn lo size mon bann konplent?

² SENYER ti reponn mwan. I ti dir: Ekri sa vizyon; ekri li lo bann plak pour kapab lir li fasilman.

³ Annefe, sa i ankor en vizyon pour en letan ki'n ganny fikse. I pou realize byento; sa i laverite. Si i tarde, espere, akoz i pou sirman realize, san tarde.

⁴ I gonfle avek lorgey, i pa fer sa ki drwat. Me sa enn ki zis, pou viv par son lafwa.

⁵ I vre, diven i en tret: Sa enn ki vantar pa reste trankil. I ouver gran son lagorz, parey lemonn lanmor. Parey lanmor, i pa zanmen satisfe. I atir tou nasyon kot li; i ralye otour li tou bann pep.

⁶ Me dimoun pou fer li vin en fars, en size plezantri. Zot pou dir: Maler lo sa enn ki akimil larises ki pa pour li! Ziska kan ou pou zis akimil det!

⁷ Eski dimoun ki ou dwa pa pou aparet en sel kou? Eski bann ki fer ou tranble pa pou leve en sel kou? Aprezan i zot tour, zot pou depouy ou!

⁸ Akoz ou'n depouy en kantite nasyon, akoz ou'n fer disan imen koule, akoz vyolans dan pei, dan lavil e kot tou son bann zabitan, leres bann pep pou depouy ou.

⁹ Maler lo sa enn ki fer profi malonnet pour son fanmir. I permet li plas son nik lao dan oter, pour ki maler pa tous li.

¹⁰ Kan ou ti deside detri en kantite bann pep, Ou desizyon in fer laont ou fanmir. Ou pe detri ou prop lavi.

¹¹ Ros dan miray pou kriye kont ou, e poto dibwa dan lakaz pou reponn li.

¹² Maler lo sa enn ki konstri en lavil lo disan, e plas fondasyon lavil lo krim!

¹³ Bann pep i fatig zot pour dife; bann popilasyon i rente pour nanryen. Tousala, pa i sorti kot SENYER liniver?

¹⁴ Me, parey delo i ranpli lanmer, later antye pou konn grander SENYER.

¹⁵ Maler pour sa enn ki fer bwar son prosen, e ki vers pwazon pour soul son prosen, pour fer li montre son touni!

¹⁶ Ou'n kouver ou avek laont plito ki loner. Akoz ou osi, pa ou bwar e tir ou touni? Lakoup ki dan lanmen drwat SENYER pou savir lo ou: Ou loner pou sanz an laont!

¹⁷ Vyolans kont Liban pou tourn kont ou; destriksyon bann zannimo pou fer ou per akoz disan imen, akoz vyolans kont pei, kont lavil e kont son bann zabitan.

¹⁸ Akfer fabrik en stati fer par en artizan? I zis en zidol an metal ki'n ganny forze, pour fer dimoun krwar dan mansonz. I pa ni menm koze, me en artizan i met konfyans dan li?

¹⁹ Maler lo ou ki dir avek en morso dibwa: Leve e ki dir avek en stati an ros: Reveye! Eski i kapab ansennyen? I en stati kouver avek lor ek larzan, me i napa okenn souf lavi dan li.

²⁰ Me SENYER i prezan dan son tanp sen. Later antye! Fer silans devan li.