Habakouk 1 - Labib An Kreol Seselwa

¹ Mesaz kondannasyon ki Bondye ti revel Habakouk dan en vizyon.

Habakouk I Denons Lenzistis

² SENYER! Ziska kan, mon pou kontinyen kriy osekour me ou pa ekoute? Ziska kan mon pou kriy ver ou kont vyolans? Me ou pa delivre mwan.

³ Akoz ou fer mwan war lemal, e ou regar i kontinyen reste lo lenzistis? Otour mwan, i annan zis ravaz ek vyolans. Partou, i annan zis kerel ek dispit.

⁴ Alor, lalwa nepli ganny pratike. Personn pa rann lazistis koman fodre. Malfeter i atak sa enn ki bon. Alor, lazistis i ganny bafwe bann ziz i rann bann zizman enzis.

Repons Bondye

⁵ SENYER i dir: Gete sa ki pe pase parmi bann nasyon. Ou pou etonnen e sezi! Aksyon i deza pe ganny egzekite. Ou pa pou krwar, si ou antann rakonte.

⁶ Mon pe anvoy bann Babilonyen, sa nasyon vyolan, san pitye, ki travers partou dan bann pei, pour pran posesyon bann landrwa ki pa pour zot.

⁷ Zot en pep terib ki fer per. Zot enpoz zot prop lalwa ek zot lotorite.

⁸ Zot bann seval i pli rapid ki bann leopar, pli feros ki bann loulou aswar. Zot bann kavalye i atake. Zot bann kales lager i sorti lwen. Zot anvole koman leg kan i atake pour li devore.

⁹ Zot arive avek vyolans; zot figir i get drwat devan zot. Zot anmas prizonnyen ki nonbre konman disab.

¹⁰ Zot napa respe pour bann lerwa. Zot mepriz bann sef. Zot tanpi bann fortifikasyon. Zot met en lateras later kont bann miray ki zot pran.

¹¹ Alor, zot pase parey en gro divan e kontiny zot semen. Sa ki enportan pour zot, se zot lafors. Zot pran lafors pour zot bondye.

Konplent Habakouk

¹² SENYER, mon Bondye, mon Sen! Ou ki SENYER, depi touzour. Ou pa pou mor. SENYER! Ou'n swazir bann Babilonyen pour egzekit ou zizman. Mon Ros protekter! Ou'n etabli zot pour pini nou.

¹³ Ou lizye i tro pir pour kontanple lemal. Ou pa kapab get maler, pourtan, ou get bann tret san dir nanryen. Kan bann malfeter i detri bann pli zis ki zot, akoz ou reste trankil?

¹⁴ Ou tret bann imen koman pwason dan lanmer, parey bann pti zensek ki napa okenn met.

¹⁵ Bann Babilonyen i kros zot avek lanmson; i anmenn zot dan zot lasenn. Alor, zot selebre; zot dan gran lazwa.

¹⁶ Pour sa rezon, zot ofer en sakrifis an loner zot lasenn e bril lansan devan zot karle. Annefe, akoz sa, ki zot in atrap bokou pwason, e manz bann bon repa.

¹⁷ Alor, eski zot kapab arete servi zot lasenn e masakre lezot nasyon san pitye?