Galat 6 - Labib An Kreol Seselwa

Soutenir Kanmarad

¹ Mon bann zanmi! Si zot arive sirprann en dimoun pe fer en keksoz mal, zot ki posed Lespri Bondye, zot devre anmenn li lo vre semen avek douser. Sakenn vey byen son prop lekor, fer atansyon ki ou menm, ou pa ganny tante.

² Anmenn fardo kanmarad e zot ava obei lalwa Kris.

³ Si en dimoun i krwar ki i enportan, alor ki i en nanryen ditou, i pe anbet son prop lekor.

⁴ Sakenn i devre egzamin son prop aksyon. Alor, si i annan keksoz pour fer li fyer, i ava fyer pour son prop aksyon, san ki i bezwen konpar pour li avek lezot.

⁵ Annefe, sakenn i devre anmenn son prop fardo.

⁶ Sa enn ki resevwar lansennyman Laparol, i devre partaz sa ki i annan avek sa enn ki ansenny li.

⁷ Pa bezwen tronp ou lekor: Personn pa kapab provok Bondye. Dimoun i rekolte sa ki i'n senmen.

⁸ Sa enn ki senm sa ki fer plezir son natir imen, pou rekolte dapre son natir imen: Lanmor. Me si i senm sa ki fer plezir Lespri, i pou rekolte sa ki sorti kot Lespri: Lavi eternel.

⁹ Annou pa fatige fer lebyen; akoz si nou pa dekouraze, nou pou rekolte dan son letan.

¹⁰ Alor, pandan ki nou annan lokazyon, annou fer dibyen tou dimoun, sirtou nou bann frer ek ser dan lafwa.

Dernyen Lavertisman

¹¹ Gete avek ki groser lekritir mon pe ekri zot. Annefe, mon pe ekri zot avek mon prop lanmen.

¹² Sa bann dimoun ki oule fors ou ganny sirkonsi, zot oule fer zot ganny byen war pour bann rezon imen. Zot zis pa oule ganny persekite akoz lakrwa Kris.

¹³ Menm sa bann ki'n ganny sirkonsi, zot pa obzerv Lalwa. Zot oule ou ganny sirkonsi, zis pour zot kapab vant zot lekor ki zot in enpoz sa siny dan ou laser.

¹⁴ Kanta mwan, mon oule vant mon lekor zis dan lakrwa nou Senyer Zezi-Kri. Annefe, gras a lakrwa ki lemonn in ganny krisifye pour mwan, e mwan pour lemonn.

¹⁵ Ni sirkonsizyon, ni ensirkonsizyon, napa lenportans. Sa ki enportan, se ki nou vin en nouvo kreatir.

¹⁶ Pour tou dimoun ki swiv sa lareg dan zot lavi, mon dir: Lape, labonte Bondye ava avek zot, osi avek pep Bondye antye.

¹⁷ Dan lavenir, fodre pa ki personn i donn mwan plis traka. Annefe, mon annan bann mark Zezi dan mon lekor.

¹⁸ Mon bann frer ek ser! Ki lagras nou Senyer Zezi-Kri i avek zot lespri. Amenn!