Galat 5 - Labib An Kreol Seselwa

Vre Liberte

¹ Kris in liber nou pour ki nou vin vreman lib. Alor, tenir for dan sa liberte e pa retonm dan lesklavaz.

² Aprezan, mwan Pol, mon dir zot: Si zot fer zot ganny sirkonsi, Kris pa pou servi zot dan nanryen.

³ Mon konfirmen ankor en fwa: Tou zonm ki fer li ganny sirkonsi, i oblize met an pratik Lalwa antye.

⁴ Zot tou ki pe esey rod ganny zistifye par Lalwa, zot in separe avek Kris, e zot in perdi lagras.

⁵ Kanta nou, nou met nou lespwar dan Bondye ki pou rann nou zis devan li. Sanmenm sa ki nou pe espere, par pwisans Lespri Sen ki travay atraver nou lafwa.

⁶ Annefe, ni sirkonsizyon, ni ensirkonsizyon pa enportan. Lafwa ki azir par lanmour ini avek Kris Zezi ki konte.

⁷ Zot ti'n byen konmanse. Lekel ki'n fer zot arete obeir laverite?

⁸ Sa ki zot in ganny dir pour konvenk zot, pa sorti kot Bondye ki pe apel zot.

⁹ Parey proverb i dir: En pti pe lelven i fer leve lapat antye.

¹⁰ Sepandan, mon annan konfyans dan Senyer pour sa ki konsern zot: Zot ava mazin parey mwan. Me sa dimoun ki pe trouble zot, pou ganny son pinisyon.

¹¹ Kanta mwan, mon bann frer, si ti vre ki mon pe ankor pres lo sirkonsizyon, akoz alor, mon kontinyen ganny persekite? Dan sa ka alor, anons Kris krisifye lo lakrwa, nepli en skandal pour personn!

¹² Mon demande ki sa bann dimoun ki pe trouble zot, zot sizle zot prop lekor!

¹³ Mon bann frer ek ser! Zot in ganny apele pour viv lib. Me selman, pa fer sa liberte en preteks pour viv dapre dezir zot natir. O kontrer, les zot ganny gide par lanmour pour servi kanmarad.

¹⁴ Annefe, Lalwa antye i dan sa sel komannman: Ou ava kontan ou prosen parey ou prop lekor.

¹⁵ Me si zot morde e devor kanmarad, fer byen atansyon: Zot pou fini par detri kanmarad.

Viv dapre Lespri

¹⁶ Aprezan, la sa ki mon annan pou dir zot: Les Lespri diriz zot lavi e zot ava arete obeir bann dezir zot natir imen.

¹⁷ Annefe, dezir natir imen i kont lespri, e dezir Lespri i kont dezir natir imen. Tou le de, zot konpletman opoze avek kanmarad, de sort ki zot pa kapab fer sa ki zot ti ava oule.

¹⁸ Si zot les zot ganny dirize par Lespri, Lalwa pou napa kontrol lo zot.

¹⁹ La bann aksyon ki sorti kot natir imen: Limoralite, lenpirte, vis,

²⁰ ladorasyon zidol, siperstisyon, laenn, diskord, zalouzi, lakoler, egoism, divizyon,

²¹ groker, parti bwar ek manze, ek lezot aksyon parey ankor. Mon averti zot parey mon'n deza fer li: Bann ki pratik sa bann keksoz parey, pa pou erit Rwayonm Bondye.

²² Me la bann fri ki Lespri i prodwi: Lanmour, lazwa, lape, pasyans, labonte, zenerozite, fidelite,

²³ ladouser, kontrol lo son prop lekor. Lalwa pa kont bann keksoz parey.

²⁴ Me bann ki pour Zezi-Kri, in krisifye zot prop natir imen avek zot bann pasyon ek zot bann dezir.

²⁵ Si nou viv par Lespri, annou les Lespri osi kontrol nou lavi.

²⁶ Annou pa orgeye, annou pa pran lakoler avek kanmarad, e annou pa zalou kanmarad.