Galat 3 - Labib An Kreol Seselwa

Lalwa ek Lafwa

¹ Bann Galat fou! Lekel ki'n zet sor lo zot? Pourtan, zot in ganny en deskripsyon kler lo Zezi-Kri ki'n ganny krisifye.

² Dir mwan: Eski zot ti resevwar Lespri Bondye akoz zot ti pratik sa ki Lalwa i ordonnen, oubyen akoz zot ti antann e krwar dan Bonn Nouvel?

³ Ki mannyer zot kapab telman bet? Sa ki zot in konmans avek Lespri Bondye, eski zot oule aprezan fini avek zot prop lafors?

⁴ Eski zot in fer tou sa bann leksperyans pour nanryen ditou? Sa i pa posib.

⁵ Sa enn ki donn son Lespri e ki fer bann mirak parmi zot, eski i fer sa akoz zot obei Lalwa, oubyen akoz zot annan lafwa dan sa Bonn Nouvel ki zot in tande?

⁶ Konmsa menm ki Abrahanm ti krwar dan Bondye, e akoz sa, i ti ganny rekonnet koman en zis.

⁷ Zot devre alor konpran ki dimoun ki viv dapre lafwa, ki bann vre zanfan Abrahanm.

⁸ Lekritir ti'n prevwar ki Bondye pou zistifye bann non-Zwif akoz zot lafwa. Alor, i ti davans anons Abrahanm sa Bonn Nouvel kan i ti deklare: Tou bann nasyon pou ganny beni atraver ou.

⁹ Abrahanm ti krwar e i ti ganny beni. Konmsa, tou dimoun ki annan lafwa i resevwar benediksyon parey Abrahanm.

¹⁰ Me tou dimoun ki kont lo lobeisans Lalwa, zot anba malediksyon. Annefe, Lekritir i deklare: Modi sa enn ki pa gard tou sa ki'n ekri dan sa liv Lalwa, e pa met li an pratik.

¹¹ I kler ki personn pa ganny zistifye devan Bondye par Lalwa. Annefe, Lekritir i deklare: Sa enn ki zis pou viv par lafwa.

¹² Me Lalwa napa nanryen pour fer avek lafwa. O kontrer, parey Lekritir i osi deklare: Sa enn ki met an pratik lalwa, pou viv par lalwa.

¹³ Kris in liber nou kont malediksyon Lalwa, akoz i'n pran malediksyon dan nou plas. Annefe, Lekritir i deklare: Modi sa enn ki ganny pann lo en pye dibwa.

¹⁴ Konmsa ki benediksyon ki ti'n ganny promet avek Abrahanm, in osi ganny donn avek bann non-Zwif, gras a Zezi-Kri. Alor, par lafwa, nou resevwar Lespri ki Bondye in promet.

Lalwa avek Promes

¹⁵ Mon bann frer ek ser! Les mwan servi en legzanp dan lavi tou le zour: Personn pa kapab kas testaman en dimoun, ni azout nanryen, enn fwa ki i'n ganny ratifye.

¹⁶ Bondye ti fer son bann promes avek Abrahanm e avek son desandans. I pa ti dir: Avek son bann desandan, konmsi i annan plizyer. Me i ti refer avek en sel: Avek ou desandan, setadir Kris.

¹⁷ La sa ki mon oule dir: Bondye in etabli en testaman. Lalwa ki'n vin an viger 430 an plitar, pa kapab anil li, ni kas promes Bondye.

¹⁸ Me si leritaz ki Bondye in promet i depann lo Lalwa, alor, i pa kapab depann lo son promes. Pourtan, se par en promes ki Bondye in donn Abrahanm son faver.

¹⁹ Alor, akfer Lalwa? I ti ganny entrodwir akoz pese, ziska ki sa desandan Abrahanm avek ki promes ti ganny fer, i arive. Sa Lalwa ti ganny anonse par bann lanz ki'n servi en lentermedyer.

²⁰ Me en lentermedyer napa son rezondet kan i annan zis en sel dimoun, e Bondye li, i en sel.

Rol Lalwa

²¹ Eski sa i vedir ki Lalwa i kont promes Bondye? Sertennman non! Si Bondye ti'n donn en lalwa ki kapab prodwir vre lavi, alor dimoun ti ava ganny zistifye par sa lalwa.

²² Me Lekritir in dir ki pese i kontrol tou keksoz, pour ki promes i ganny akonpli par lafwa an Zezi-Kri, pour tou dimoun ki krwar.

²³ Avan ki letan lafwa ti arive, nou ti anba sirveyans Lalwa, ziska ki lafwa ti ganny revele.

²⁴ Alor, Lalwa ti nou gid ziska ki Kris ti arive, pour ki nou ganny zistifye devan Bondye par lafwa.

²⁵ Aprezan ki letan lafwa in arive, nou nepli ganny kontrole par en sirveyan.

²⁶ Annefe, par lafwa ki ini zot avek Zezi-Kri, zot tou, zot zanfan Bondye.

²⁷ Wi! Zot tou ki'n ganny ini avek Kris par zot batenm, zot in osi ganny abiye par Kris.

²⁸ Alor, i nepli annan okenn diferans ant Zwif ek non-Zwif, ant lesklav e ant dimoun lib, zonm oubyen fanm, akoz zot tou, zot in vin en sel avek Zezi-Kri.

²⁹ E si zot pour Kris, alor, zot bann desandan Abrahanm, e zeritye promes ki Bondye in fer.