Galat 2 - Labib An Kreol Seselwa

Pol ek Lezot Zapot

¹ Answit, 14 an plitar, mon ti retourn Zerizalenm avek Barnabas. Mon ti anmenn Tit osi avek mwan.

² Mon ti al laba apre en revelasyon sorti kot Bondye. Dan en renyon prive ki mon ti fer avek bann dirizan, mon ti fer zot konnen, e mon ti eksplik zot Bonn Nouvel ki mon anons avek bann non-Zwif. Mon pa ti oule ki travay ki mon'n fer dan lepase oubyen aprezan i vin initil.

³ Annefe, Tit ki ti en Grek, e ki ti pe akonpanny mwan, pa ti menm oblize pour li ganny sirkonsi.

⁴ Ti annan serten, sepandan, bann fo frer, ki ti pretann ki zot bann krwayan. Zot ti zwenn avek nou group an sekre koman bann espyon pour obzerv laliberte ki nou posede dan Zezi-Kri, pour fer nou vin lesklav lalwa.

⁵ Me nou pa ti sede avek zot pour en sel moman, pour ki laverite Bonn Nouvel i reste parmi zot.

⁶ Me bann ki ti ganny konsidere koman dirizan parmi zot, pa fer mwan nanryen pour konnen ki zot ti ete, akoz Bondye pa ziz dapre laparans; sa bann dirizan pa ti enpoz okenn nouvo lord lo mwan.

⁷ O kontrer, zot ti war ki Bondye ti'n konfye mwan responsabilite pour anons Bonn Nouvel avek bann non-Zwif parey i ti'n konfye Pyer sa responsabilite pour anons Bonn Nouvel avek bann sirkonsi.

⁸ Bondye ki'n fer Pyer vin zapot pour bann sirkonsi, i'n osi fer mwan vin zapot pour bann ki pa'n ganny sirkonsi.

⁹ Kan zot ti rekonnet lagras ki mon ti'n gannyen, Zak, Pyer ek Zan ki ti ganny konsidere koman bann dirizan, bann kolonn, zot ti donn mwan ek Barnabas lanmen drwat; sa ti koman en siny lakominyon. Alor, nou ti tonm dakor ki Barnabas ek mwan, nou pou al kot bann non-Zwif e zot, zot pou al kot bann Zwif.

¹⁰ Zot ti selman dir nou ki nou devre mazin bann pov, en keksoz ki mon ti touzour fer.

Diskisyon ant Pol ek Pyer

¹¹ Me kan Pyer ti vin Antyos, mon ti reprimann li devan tou dimoun, akoz sa ki i ti pe fer, ti mal.

¹² Annefe, avan ki serten zonm anvoye par Zak, ti arive, Pyer ti manz avek bann non-Zwif. Me apre ki sa bann zonm ti'n arive, Pyer ti kasyet e reste alekar, pour li pa manz avek bann non-Zwif. I ti per sa bann ki ti an faver sirkonsizyon.

¹³ Lezot krwayan Zwif ti fer parey Pyer dan en fason ipokrit, e Barnabas osi ti les li ganny enfliyanse par sa menm ipokrizi.

¹⁴ Kan mon ti war ki zot ti pe mal fer, e ki zot fason azir pa ti dapre laverite Bonn Nouvel, mon ti dir avek Pyer devan tou dimoun ki ti la: Si ou ki Zwif, ou viv parey bann non-Zwif, e non pa parey Zwif, ki mannyer ou, oule fors bann non-Zwif viv parey bann Zwif?

Nou Ganny Sove par Lafwa

¹⁵ Nou, nou Zwif par nesans, e nou pa bann peser parey bann non-Zwif.

¹⁶ Nou konnen ki en dimoun pa ganny zistifye devan Bondye an pratikan sa ki Lalwa Moiz i ordonnen, me par lafwa dan Zezi-Kri. Nou osi nou'n krwar dan Zezi-Kri, pour ki nou ganny zistifye par lafwa dan Kris, e non pa akoz nou pratik tou sa ki Lalwa Moiz i ordonnen. Annefe, personn pa pou ganny zistifye akoz i pratik sa ki Lalwa Moiz i ordonnen.

¹⁷ Me si, pandan ki nou pe rod ganny zistifye dan Kris, nou osi ganny trouve peser parey bann non-Zwif, eski Kris i vin serviter pese? Sertennman non!

¹⁸ Annefe, si mon rekonstri en keksoz ki mon'n detri, mon vin mwan menm koupab.

¹⁹ An sa ki konsern Lalwa, lakoz mon lanmor i Lalwa li menm, pour ki mon kapab viv pour Bondye. Mon'n ganny krisifye avek Kris;

²⁰ nepli mwan ki pe viv, me Kris ki pe viv dan mwan. Lavi ki mon annan aprezan, mon viv li par lafwa dan Garson Bondye ki'n kontan mwan. Li menm ki'n donn son lavi pour mwan.

²¹ Mon pa rezet lagras Bondye. Annefe, si en dimoun i ganny trouve zis par Lalwa, alor Kris in mor pour nanryen.