Galat 1 - Labib An Kreol Seselwa

¹ Sa let i sorti kot Pol, en zapot ki pa'n ganny swazir par zonm, ni par lentermedyer zonm, me par Zezi-Kri e par Bondye, son Papa ki'n resisit li,

² ek tou bann frer ki avek mwan, pour Legliz Galasi.

³ Mon demande ki Bondye, nou Papa e nou Senyer Zezi-Kri ava donn zot lagras ek lape.

⁴ Kris in donn son prop lekor pour sov nou dan nou pese, pour delivre nou anba pouvwar sa lemonn aktyel e move, dapre lavolonte Bondye, nou Papa.

⁵ Laglwar i pour Bondye pour touzour e touzour! Amenn.

En Sel Bonn Nouvel

⁶ Mon etonnen ki byen vit, zot in abandonn sa Enn ki'n swazir zot par lagras Kris, e ki zot pe tourn ver en lot Bonn Nouvel.

⁷ An realite, napa en lot Bonn Nouvel, me i annan dimoun ki pe trouble zot e ki oule sanz Bonn Nouvel Kris.

⁸ Me si nou, oubyen menm en lanz sorti dan lesyel i anons zot en Bonn Nouvel ki diferan avek sa ki nou'n anons zot, ki i ganny modi!

⁹ Parey mon'n deza dir zot, e la mon repete: Si en dimoun i anons en Bonn Nouvel diferan avek sa ki zot in resevwar, ki i ganny modi!

¹⁰ Dir mwan aprezan: Eski mon pe rod faver imen oubyen faver Bondye? Eski mon pe rod fer plezir bann zonm? Si mon ti ankor pe fer plezir bann zonm, mon ti pou nepli en serviter Kris.

Koman Pol in Resevwar Bonn Nouvel

¹¹ Mon bann frer ek ser! Mon oule ki zot konnen: Bonn Nouvel ki mon'n anonse i pa sorti kot zonm.

¹² Mon pa ti ganny li oubyen aprann li avek en zonm, me mon'n resevwar li par en revelasyon Zezi-Kri.

¹³ Zot in sirman antann koz lo mwan, lo sa ki mon ti fer kan mon ti pratik larelizyon Zwif: Mon ti persekit avek vyolans Legliz Bondye e mon ti esey detri li.

¹⁴ Mon ti progres pli vit dan larelizyon Zwif ki bokou dan mon laz. Mon ti annan bokou plis devouman pour bann tradisyon mon bann zanset, ki lezot Zwif.

¹⁵ Me Bondye, dan son bonte, ti swazir mwan. Avan menm mon nesans i ti'n apel mwan pour servi li.

¹⁶ I ti trouv bon pour revel mwan son Garson, pour ki mon anons li parmi bann non-Zwif.

¹⁷ Mon pa ti ni menm al Zerizalenm kot bann ki ti zapot avan mwan; me mon ti al deswit an Arabi. Apre sa, mon ti retourn Damas.

¹⁸ Selman 3 an plitar ki mon ti mont Zerizalenm pour fer konnesans avek Pyer, e mon ti reste de semenn avek li.

¹⁹ Mon pa ti war okenn lezot zapot, apard Zak, frer Senyer.

²⁰ Sa ki mon pe ekri la, mon dir li devan Bondye, mon pa pe manti.

²¹ Apre, mon ti al dan rezyon Lasiri ek Silisi.

²² Bann kretyen dan bann Legliz dan Zide pa ti konn mwan personnelman.

²³ Zot ti'n zis antann dir: Sa enn ki dan lepase ti pe persekit nou, aprezan i pe anons sa lafwa ki avan i ti oule detri.

²⁴ E zot ti loue Bondye lo mon size.