Filipyen 2 - Labib An Kreol Seselwa

Limilite ek Grander Kris

¹ Si Kris i rann zot pli for, si son lanmour i donn zot kouraz? Si son lespri i ini zot. Si zot annan lafeksyon ek labonte pour kanmarad.

² Alor, si sa i vre, mon demann zot, rann mon lazwa konplet an vivan en lavi ini ant kanmarad, avek en menm lanmour, en menm lespri, e en sel panse.

³ Pa fer nanryen dan en lespri konpetisyon ni par lorgey. O kontrer avek limilite, konsider lezot pli enportan ki ou.

⁴ Zot pa devre rod zis zot prop lentere, me ki sakenn zot i pran konsiderasyon pour lezot.

⁵ Zot devre annan menm konportman ant zot, parey dimoun ki ini avek Zezi-Kri:

⁶ Menm si i ti vreman posed natir Bondye, Zezi-Kri pa ti oule fer li pas pour egal avek Bondye.

⁷ Me, par son prop volonte, i ti renons tou sa ki i ti posede, pour pran kondisyon en serviter. I ti pran natir imen.

⁸ I ti abes li e vin obeisan ziska lanmor, menm lanmor lo en lakrwa.

⁹ Pour sa rezon, Bondye in elev li dan en plas pli o ki tou, e donn li en non pli enportan ki tou lezot non.

¹⁰ Alor, devan non Zezi, ki tou sa ki dan lesyel, lo later e dan lemonn pli ba ki later, zot tonm azenou

¹¹ e ki tou i proklanmen, ki Zezi-Kri i Senyer, pour laglwar Bondye Papa.

Briye koman Lalimyer dan Lemonn

¹² Mon bann zanmi! Zot in touzour obei mwan kan mon ti parmi zot. Aprezan ki mon lwen avek zot, kontinyen obeir plis ankor. Travay avek limilite ek respe pour zot ganny sove.

¹³ Annefe, Bondye i travay dan zot. I donn zot lavolonte e i rann zot kapab pour akonpli tou, dapre son prop plan.

¹⁴ Fer tou keksoz san okenn konplent, ni diskisyon.

¹⁵ Konmsa, zot ava inosan, san repros, bann zanfan Bondye san defo parmi dimoun malonnet e move ki dan sa monn. Zot devre briye parmi sa bann dimoun, parey bann zetwal dan lesyel,

¹⁶ akoz zot port parol lavi. Sa i ava rann mwan fyer zour Kris ava retournen, akoz mon pa ava'n travay pour nanryen.

¹⁷ Petet ki mon disan ava ganny verse koman en lofrann avek sakrifis ki zot lafwa i prezante devan Bondye. Si sa i arive, mon ere e mon partaz mon lazwa avek zot tou.

¹⁸ Zot osi, zot devre ere e rezoui avek mwan.

Timote ek Epafrodit

¹⁹ Mon annan lespwar dan Senyer Zezi ki mon ava kapab byento anvoy Timote kot zot. Konmsa, mwan osi, mon ava ganny rekonforte par nouvel sorti kot zot.

²⁰ Zis Timote ki'n pran par dan traka ki mon fer pour zot e ki vreman fer sousi pour zot.

²¹ Tou lezot i rod zot prop lentere e pa lakoz Zezi-Kri.

²² Zot konnen zot menm ki mannyer Timote in montre son fidelite: I'n travay avek mwan, dan servis Bonn Nouvel, parey en garson avek son papa.

²³ Mon swete anvoy li kot zot, de ki mon ava war kler dan mon sityasyon.

²⁴ Mon annan konfyans dan Senyer, ki byento mon pou vin war zot mwan menm.

²⁵ Mon'n krwar ki ti fodre mon ranvoy zot mon frer Epafrodit, mon koleg dan travay e dan lalit. Zot ti anvoy li kot mwan pour ed mwan kan mon ti dan bezwen.

²⁶ I byen anvi revwar zot tou; i trakase akoz zot ti'n aprann ki i ti malad.

²⁷ Annefe, i ti malad, e pre pour mor. Me Bondye ti pran pitye pour li, pa zis pour li, me osi pour mwan, pour ki mon pa sibir en pli gran tristes.

²⁸ Pour sa rezon, mon'n deside anvoy li deswit, pour ki zot ava dan lazwa pour revwar li, e mon tristes ava disparet.

²⁹ Alor, akey li avek en gran lazwa, parey en frer dan Senyer. Zot devre annan bokou respe pour bann zonm parey li.

³⁰ Annefe, se akoz misyon Kris ki i ti pre pour mor. I'n riske son lavi pour li donn mwan led ki zot pa ti kapab donnen.