Filemon 1 - Labib An Kreol Seselwa

Konpliman

¹ Sa let i sorti kot Pol, prizonnyen pour Zezi-Kri, ek nou frer Timote, pour Filemon nou bon kanmarad travay.

² Pour nou ser Apia ek Arsip, nou kanmarad dan konba e pour Legliz ki rasanble dan ou lakaz.

³ Lagras ek lape Bondye nou Papa e nou Senyer Zezi-Kri ava avek zot.

Lanmour ek Lafwa Filemon

⁴ Mon touzour remersye mon Bondye dan mon lapriyer lo ou size.

⁵ Annefe, mon antann koz lo lanmour ki ou annan pour tou bann krwayan, ek ou lafwa dan nou Senyer Zezi.

⁶ Mon priye ki lafwa ki nou annan ansanm, i fer son lefe dan ou. Konmsa, ou ava konn tou sa dibyen ki nou kapab fer dan servis Kris.

⁷ Ou lanmour, mon frer, in donn mwan bokou lazwa ek lankourazman, akoz ou'n rekonfort leker tou bann krwayan.

Reket An Faver Onezim

⁸ Ensi, menm si dan lakominyon avek Kris, mon lib pour ordonn ou sa ki ou devre fer,

⁹ mon prefere, sipliy ou lo non lanmour. Alor, mwan Pol, en vyeyar aprezan, osi en prizonnyen Zezi-Kri,

¹⁰ mon adres ou en reket an faver Onezim. I'n vin mon garson an Zezi-Kri, isi dan prizon.

¹¹ Lontan i ti itil zis pour ou; me aprezan i vin itil pour nou tou le de.

¹² Aprezan, ki i'n vin en parti mwan menm, mon pe fer li retourn kot ou.

¹³ Mon ti ava byen kontan gard li avek mwan, pour ed mwan dan ou plas, pandan ki mon dan prizon akoz Bonn Nouvel.

¹⁴ Me mon pa'n oule fer nanryen san ou konsantman. Mon napa lentansyon fors ou fer mwan en faver; me fer li avek bonker.

¹⁵ Kekfwa Onezim ti ganny separe avek ou pour en pe letan, pour ki i retourn kot ou pour touzour.

¹⁶ Non pa ankor koman en senp lesklav, me pli bon ki en lesklav: Koman en frer byenneme. Pour mwan, i spesyal. Me pour ou, i devre et plis ankor, pa selman koman en et imen, me osi koman en kretyen.

¹⁷ Alor, si ou konsider mwan koman ou frer dan lafwa, resevwar li parey ou ti ava resevwar mwan.

¹⁸ Si i'n fer ou ditor, oubyen si i dwa ou keksoz, met sa lo mon kont.

¹⁹ Mwan Pol ki ekri sa avek mon prop lanmen: Mon pou ranbours ou. Mon pa bezwen rapel ou ki ou menm, ou dwa mwan ou prop lavi.

²⁰ Wi, mon frer! Pour lanmour Senyer, akord mwan sa faver. Koman en frer dan Kris, met en pe lazwa dan mon leker.

²¹ Pandan ki mon pe ekri ou, mon kont lo ou lobeisans; e mon annan en gran konfyans ki ou pou fer bokou plis ki sa.

²² Anmenmtan, prepar en lasanm pour mwan. Annefe, mon espere ki Bondye pou egzos zot lapriyer e les mwan retourn kot zot.

Konpliman Final

²³ Epafras ki dan prizon pour Zezi-Kri ansanm avek mwan, i fer ou salanm,

²⁴ ensi ki mon bann koleg travay, Mark, Aristark, Demas, ek Lik.

²⁵ Lagras Senyer Zezi-Kri ava avek zot!