Ezekyel 9 - Labib An Kreol Seselwa

Zerizalenm I Ganny Pini

¹ Apre, mon ti antann SENYER kriy byen for: Koste, zot ki egzekit pinisyon kont lavil, sakenn avek son zarm destriksyon.

² Alor, sis zonm ti arive par laport siperyer ki vir lo kote Nor. Sakenn ti annan son zarm pour masakre dan son lanmen. Parmi zot, ti annan en zonm abiye dan lenz linenn ki ti annan son lekipman pour ekri dan son kote. Zot ti antre e debout akote lotel an bronz.

³ Laglwar Bondye Izrael ti mont par lao bann seriben e al dan direksyon lantre tanp; i ti apel sa zonm dan lenz linenn ki ti annan lekipman ekri dan son kote.

⁴ SENYER ti dir li, “Al partou atraver lavil, atraver Zerizalenm; met en mark lo fron bann ki plennyen e plere akoz bann aksyon degoutan ki ganny komet dan sa lavil.”

⁵ I ti osi dir avek lezot dan mon prezans, “Swiv li atraver lavil e touy tou sa ki ou war, san okenn pitye pour personn.

⁶ Touy zot tou: Vyeyar, zennzan, zenn fiy, pti zanfan ek bann fanm, me pa tous personn ki annan mark lo fron. Ou ava konmans par mon sanktyer.” Alor, zot ti konmans touy bann ansyen ki ti devan tanp.

⁷ Apre, i ti dir zot, “Touy tou dimoun ki dan lakour tanp, ranpli lakour avek kadav e fer tanp vin enpir. Apre ale.” Alor, zot ti ale e zot ti masakre tou dan lavil.

⁸ Pandan ki zot ti pe fer sa masak, mon ti reste tousel. Mon ti tonm lafas ater e plere, “A wi! Senyer BONDYE! Dan ou gran lakoler kont Zerizalenm, eski ou pou detri tou restan Izraelit?”

⁹ I ti reponn, “Pese pep Izrael ek Zida i tre grav. Pei i ranpli avek disan e lavil i ranpli avek lenzistis akoz zot pe dir: SENYER in abandonn sa pei e SENYER pa war nou.

¹⁰ Mwan, mon pa pou montre okenn konpasyon, ni pitye pour personn, me mon pou fer zot siport konsekans zot bann aksyon.”

¹¹ Sa menm moman, sa zonm dan lenz linenn ek son ekritwar ti vin fer son rapor, “Mon'n fini fer sa ki ou'n ordonnen.”