Ezekyel 8 - Labib An Kreol Seselwa

Ladorasyon Zidol dan Tanp Zerizalenm

¹ Senkyenm zour, sizyenm mwan dan sizyenm lannen, mon ti pe asiz dan mon lakaz; bann ansyen sorti dan Zida ti pe asiz devan mwan. En sel kou, lanmen Senyer BONDYE ti sezi mwan.

² Mon ti war en laform ki ti parey en laform imen. Son lekor, apartir son leren an desandan, ti koman en dife; par lao, i ti briye parey bronz dan dife.

³ En keksoz dan laform en lanmen ti sezi mwan par mon seve. Lespri ti soulev mwan ant later ek lesyel e transport mwan dan en vizyon dan Zerizalenm, devan lantre lo kote Nor dan tanp, kot zot ti'n plas sa stati zalouzi, ki provok zalouzi.

⁴ Laglwar Bondye Izrael ti la, parey dan sa vizyon ki mon ti war dan vale.

⁵ Apre, Bondye ti dir mwan, “Ou ki en imen, get dan direksyon Nor.” Mon ti gete, e la kot laport lotel, zis dan lantre, mon ti war sa stati zalouzi.

⁶ Bondye ti dir mwan, “Ou ki en imen, ki ou war zot pe fer? Sa ki pep Izrael pe komet la, i bann pratik degoutan ki pou fer mwan reste lwen avek mon sanktyer. Me ou pou war keksoz ki pli degoutan.”

⁷ I ti transport mwan kot lantre lakour tanp. Mon ti gete e mon ti war en trou dan miray.

⁸ Apre, i ti dir mwan, “Ou ki en imen, fouy en trou dan miray.” Mon ti fouye e ouver en pasaz.

⁹ I ti dir mwan, “Antre e get sa bann aksyon degoutan e revoltan ki ganny komet isi.”

¹⁰ Alor, mon ti antre e la sa ki mon ti war: Miray partou otour mwan ti kouver avek desen ki reprezant bann reptil ek bann zannimo degoutan ek tou bann zidol pep Izrael.

¹¹ Devan sa bann zimaz, 70 ansyen parmi pep Izrael ti pe debout. Yazanya, garson Safann ti parmi zot. Sakenn ti annan en lansanswar dan son lanmen e lafimen loder lansan ti pe monte.

¹² I ti demann mwan, “Ou ki en imen, eski ou'n war ki bann ansyen pep Izrael pe fer dan fernwanr, sakenn dan son lasal dekore avek bann zimaz? Zot dir: SENYER pa war nou, SENYER in abandonn pei.”

¹³ I ti osi dir, “Ou pou war zot pe fer aksyon pli degoutan ankor.”

¹⁴ Apre, i ti anmenn mwan kot lantre laport Nor tanp SENYER, kot en group fanm ti pe asiz e pe pler lanmor Tanmouz.

¹⁵ I ti dir mwan, “Ou ki en imen, ou'n war sa? Me ou pou war keksoz pli degoutan ankor.”

¹⁶ I ti anmenn mwan dan lakour enteryer kot lantre tanp SENYER ant vestibil ek lotel kot ti annan apepre 25 zonm. Zot ledo ti tourn avek tanp e zot figir ver Les, zot ti prosternen devan soley.

¹⁷ I ti dir mwan, “Ou ki en imen, ou'n war sa? I pa ase ki zabitan Zida i komet sa bann keksoz degoutan isi? Eski zot bezwen ranpli sa pei avek vyolans pour provok mon lakoler plis ankor? Pour ensilte mwan, zot met en brans anba mon nennen.

¹⁸ Alor, aprezan mon tour: Mon pou azir avek lakoler san pitye; mon pa pou eparny personn. Zot ava kriye avek tou zot lafors, mon pa pou ekout zot.”