Ezekyel 5 - Labib An Kreol Seselwa

Ezekyel I Koup Son Seve

¹ Ekoute, ou ki en imen! Pran en lepe byen koupe. Servi li koman en razwar; raz ou seve ek ou labarb. Pez sa seve lo en balans e partaz li an trwa porsyon.

² Ou ava bril en tyer dan dife, dan milye lavil. Apre letan ki Zerizalenm in ganny anserkle in fini, pran en lot tyer ki ou ava koup koupe avek lepe otour lavil. Ou ava fann sa dernyen tyer dan divan e mwan, mon ava servi mon lepe kont Zerizalenm.

³ Ou ava gard detrwa bren seve ki ou ava kasyet dan fon ou pos ou rob.

⁴ Ou ava osi tir detrwa bren ladan ki ou ava zet dan dife e brile. Sa dife pou propaze e bril pep Izrael.

⁵ La sa ki Senyer BONDYE i deklare: Kanta Zerizalenm, mon'n plas li dan milye bann nasyon; en kantite pei i antour li.

⁶ I'n revolte kont mon bann desizyon ek regleman plis ki lezot nasyon. Son konportman i pli move ki bann nasyon etranze ki antour li. I'n rezet mon bann desizyon e i pa'n obei mon bann regleman.

⁷ Alor, la sa ki Senyer BONDYE i deklare: Akoz ou konportman i pli move ki bann nasyon dan zalantour, ou pa'n swiv mon bann desizyon, ou pa'n gard mon bann regleman, ou pa'n ni menm swiv sa ki pour bann nasyon dan zalantour.

⁸ Alor, la sa ki Senyer BONDYE i deklare: Mwan menm, mon pou tourn kont ou! Mon pou egzekit mon zizman kont ou devan tou bann nasyon.

⁹ Akoz ou bann aksyon degoutan ki ou'n komet, mon pou egzekit kont ou sa ki mon pa'n zanmen fer e ki mon pou zanmen fer.

¹⁰ Akoz sa, dan sa lavil, bann paran pou manz zot zanfan e zanfan pou manz zot paran. Mon pou egzekit mon zizman kont ou e dispers tou bann sirvivan, dan tou kote.

¹¹ Alor, osi vre ki mon vivan, la sa ki mwan Senyer BONDYE mon deklare: Akoz ou'n rann mon sanktyer enpir par ou move konportman, par ou bann aksyon degoutan, mwan osi, mon pou abandonn ou e aret protez ou san pitye.

¹² En tyer ou zabitan pou mor, swa par lepidemi, oubyen par lafanmin dan lavil; en tyer pou ganny masakre dan zalantour; en tyer, mon pou disperse par tou kote e mon pou servi mon lepe kont zot.

¹³ Mon pou les mon lakoler azir e vanze kont zot, ziska ki mon ganny satisfaksyon. Kan mon lakoler ava'n fini avek zot, zot ava konnen ki mwan SENYER ki'n koze; mon zalou.

¹⁴ Ou Zerizalenm, mon pou fer ou vin en ta debri e en laont parmi bann nasyon dan zalantour e devan tou sa ki pas par la.

¹⁵ Kan mon pou egzekit mon zizman avek tou mon gran lakoler, mon pinisyon pou terib. Bann nasyon dan zalantour pou monk zot e ensilte zot. Zerizalenm pou vin en lavertisman e en lafreyer pour bann nasyon. Mwan SENYER ki deklare.

¹⁶ Mon pou anvoy lanmor par mon bann dart ki anmenn lafanmin: Mon pou detri tou ou rezerv manze e fer ou mor lafen.

¹⁷ Mon pou anvoy kont ou lafanmin ek zannimo sovaz ki pou touy ou bann zanfan; lepidemi, vyolans ek lager pou detri tou. Mwan, SENYER ki deklare.