Ezekyel 45 - Labib An Kreol Seselwa

Porsyon Later Rezerve pour Senyer

¹ Kan ou partaz later ant bann tribi Izrael pour donn zot koman en posesyon, ou ava rezerv en porsyon pour SENYER; i ava en porsyon sakre: 12,500 met longer e 10,000 met larzer. Sa teritwar antye pou ganny konsidere koman sakre.

² Separ en porsyon kare 250 met par 250 met pour tanp, avek en lespas 25 met toultour.

³ Dan sa teritwar sakre, mezir en seksyon 12,500 met longer e 5,000 met larzer. La lo sa porsyon, pou annan lanplasman tanp, landrwa pli sakre.

⁴ I pou en porsyon later sakre dan pei; met li apar pour bann pret ki dan servis tanp devan SENYER. I ava en landrwa sakre pour tanp, anmenmtan, i ava servi koman lakaz pour pret.

⁵ En lot seksyon, 12,500 met longer par 5,000 met larzer, ava vin pour bann levit ki dan servis tanp, koman lanplasman pour bann lavil; pou annan 20 lasal.

⁶ Lo longer sa porsyon later sakre, ou ava delimit en morso 2,500 met larzer e 12,500 longer, pour lanplasman en lavil, ki ava pour pep Izrael antye.

⁷ Ou ava rezerv pour prens ki gouvern pei, en porsyon later lo de kote, kote lavil ek kote distrik sakre. Lo kote Was, i ava ale ziska lanmer e lo kote Les, lo tou longer teritwar Izrael.

⁸ Konmsa, Sa prens ki gouvern pei, ava ganny en propriyete dan Izrael. Zot ava arete profit lo mon pep; zot ava les pep Izrael zouir pei dapre zot tribi.

Drwa ek Devwar Prens Ki Gouvern Pei

⁹ La sa ki Senyer BONDYE i deklare: Bann prens ki gouvern Izrael! Ase! Aret fer vyolans ek viktimizasyon. Respekte lalwa ek lazistis; aret vol bann byen ki pour mon pep, Senyer BONDYE i deklare.

¹⁰ Itiliz balans ek mezir zis.

¹¹ En efa ek en bat, devret bann mezir egal. Mezir debaz i en omer: En omer i egal 10 bat; en efa i egal 10 bat.

¹² Sa pyes larzan sekel i vo 20 gera; 60 sekel i vo en min.

¹³ La lofrann ki zot devre ofer: Sereal dible ek lorz: En sizyenm efa par omer.

¹⁴ Delwil i ganny fikse par bat: En dizyenm bat par kor; parey omer, dis bat i fer en kor.

¹⁵ Parmi zannimo pep Izrael: En mouton par sak troupo 200. Sa i bann lofrann vezetal, sakrifis konplet ek sakrifis lape pour pardon zot pese, Senyer BONDYE i deklare.

¹⁶ Pep antye dan pei devre zwenn ansanm pour kontribye dan lofrann pour sa prens ki gouvern Izrael.

¹⁷ Lobligasyon i tonm lo prens pour fourni sa ki neseser pour sakrifis konplet, lofrann vezetal ek lofrann diven pandan lafet, sirtou, bann nouvellin ek bann saba ek tou lezot seremoni ki ganny rekomande pour pep Izrael. I devre ofer sakrifis pour pese, lofrann vezetal, sakrifis konplet ek sakrifis lape, pour ki pep Izrael i ganny pardon son pese.

Bann Lafet

¹⁸ La sa ki Senyer BONDYE i deklare: Premye zour, premye mwan, ou ava pran en zenn toro san defo e ou ava pirifye sanktyer.

¹⁹ Pret ava pran en pe disan sakrifis pour pese e plas lo poto laport tanp, lo kat kwen bor lotel, lo montan lantre lakour enteryer.

²⁰ Setyenm zour lemwan, ou ava fer parey pour bann ki'n komet pese par erer oubyen par linyorans. Konmsa, ou ava fer pirifikasyon pour tanp.

²¹ Katorzyenm zour, dan premye mwan, ou ava selebre lafet Pak. Pandan set zour, zot ava manz dipen san lelven.

²² Sa zour, prens ki gouvern pei ava ofer en zenn toro koman sakrifis pour li menm e pour lepep dan pei antye.

²³ Pandan sa set zour lafet, i ava ofer SENYER koman sakrifis konplet, set zenn toro, set mouton mal, san defo ek en bouk tou le zour pour pardon pese.

²⁴ Koman lofrann vezetal, i ava ofer 30 kilo dible pour sak toro, avek sis lit delwil pour sak toro ek sak mouton sakrifis.

²⁵ Kenzyenm zour, dan setyenm mwan e pandan set zour lafet, i ava ofer sa menm sakrifis pour pese, sakrifis konplet, lofrann vezetal avek delwil.