Ezekyel 43 - Labib An Kreol Seselwa

Laglwar Bondye I Retourn dan Tanp

¹ Sa zonm ti anmenn mwan kot laport ki ti vir lo kote Les.

² Mon ti war laglwar Bondye Izrael sorti lo kote Les. I ti parey tapaz en gro delo. I ti ekler later avek son laglwar.

³ Sa vizyon ti parey sa enn ki mon ti'n war avan, pre larivyer Kebar, kan i ti vin detri Zerizalenm. Mon ti tonbe, lafas ater.

⁴ Laglwar SENYER ti antre dan tanp par laport ki vir lo kote Les.

⁵ Lespri Bondye ti soulev mwan e transport mwan ziska dan lakour tanp; mon ti war laglwar SENYER ranpli tanp.

⁶ Pandan ki sa zonm ki ti pe akonpanny mwan ti lanmenm akote mwan, mon ti antann en lavwa sorti dan tanp koz avek mwan.

⁷ Sa lavwa ti dir mwan: Ou ki en imen, ekoute! Isi i landrwa kot mon tronn i ete; la kot mon poz mon lipye. Mon pou reste parmi pep Izrael pour touzour. Ni pep Izrael, ni son bann lerwa pa pou dezonor mon non sen ankor par zot lavi prostitisyon e par bann kadav zot bann lerwa lo zot bann oter.

⁸ Bann lerwa in plas lantre zot pale akote montan laport mon tanp. I annan en sel miray ki separ zot lale avek mon tanp. Zot in rann enpir mon non sakre par zot bann aksyon degoutan ki zot in komet. Pour sa rezon, dan mon lakoler mon'n detri zot.

⁹ Aprezan, elwanny zot prostitisyon ek zot bann lerwa mor avek mwan e mon ava reste parmi zot pour touzour.

¹⁰ Kanta ou imen, fer en deskripsyon plan tanp devan pep Izrael. Fer zot egzamin byen sa plan pour ki zot bann fot i fer zot onte.

¹¹ Si zot vreman onte pour tou sa ki zot in fer, montre zot plan tanp. Fer zot konn son laranzman, bann antre ek bann sorti, son laform zeneral avek bann regleman, son plan ek bann lalwa. Ekri tousala e met devan zot lizye pour ki zot ava swiv tou bann regleman e met zot an pratik.

¹² La regleman pour tanp: Tou lespas lo latet sa montanny ek teritwar toultour, i devre ganny konsidere tre sakre. Sa i lalwa tanp.

Lotel

¹³ La bann dimansyon lotel: En mezir ti en pe plis ki 50 santimet. Lotel ti antoure avek en rigol anviron 50 santimet fonder e 50 santimet larzer avek an deor, en rebor 25 santimet oter. La oter lotel:

¹⁴ Depi ater ziska son platform anba, i ti mezir en met, avek en dekalaz 50 santimet larzer toultour, ziska lot platform ki ti mezir de met oter; li osi avek en dekalaz 50 santimet toultour.

¹⁵ Sa parti lotel, kot son fwaye, ti de met oter e ti annan en rebor lo son kat kwen.

¹⁶ Fwaye lotel ti form en kare sis met sak kote.

¹⁷ Dezyenm platform ti osi form en kare set met sak kote. Lo kote eksteryer, ti annan en rebor 25 santimet oter. Rigol ti 50 santimet larzer, toultour. Peron pour ariv anler ti lo kote Les.

¹⁸ Apre, i ti dir mwan: Ou ki en imen, la sa ki Senyer BONDYE i deklare: La bann regleman pour lotel: Zour ki lotel i ganny konstri pour ofer bann sakrifis konplet e pour laspersyon disan,

¹⁹ ou ava remet en toro pour sakrifis pardon pese avek bann pret levit ki sorti dan fanmir Sadok. Zis zot ki annan drwa prezant devan mwan, Senyer BONDYE i deklare.

²⁰ Ou ava pran en pe disan e met lo kat kwen lotel, lo kat kwen dezyenm platform e lo son rebor toultour. Alor, ou ava pirifye li e konsakre li pour ganny pardon pese.

²¹ Ou ava osi pran sa toro pour pardon pese e bril li dan landrwa rezerve pour sa, an deor sanktyer.

²² Son lannmen, ou ava ofer en bouk san defo pour pardon pese pour pirifikasyon lotel, parey ou fer avek toro.

²³ Kan ou ava'n fini sakrifis pirifikasyon, ou ava pran dan troupo, en toro san defo ek en mouton mal san defo pour sakrifis.

²⁴ Ou ava prezant zot devan SENYER. Bann pret ava fann disel lo zot e ofer zot koman sakrifis konplet devan SENYER.

²⁵ Tou le zour, pandan set zour, ou ava ofer sakrifis en bouk pour pardon pese. Apre, ou ava osi ofer en toro ek en mouton mal san defo.

²⁶ Pandan set zour i ava annan sakrifis pour pardon pese. Lotel ava ganny pirifye e ganny konsakre.

²⁷ Apre sa set zour, bann pret ava ofer lo lotel, sakrifis konplet ek bann sakrifis lakominyon pour lepep. Alor, mon ava aksepte zot. Senyer BONDYE ki'n deklare.