Ezekyel 42 - Labib An Kreol Seselwa

Batiman obor Tanp

¹ Apre, i ti fer mwan sorti dan lakour eksteryer tanp lo kote Nor. I ti anmenn mwan dan bann lasal ki ti vizavi lakour tanp e vizavi batiman lo kote Nor.

² Batiman ki ti lo kote Nor ti 50 met longer e 25 met larzer.

³ Anfas, ti annan en lespas dan lakour enteryer ki ti 10 met lo en kote tanp. Lot kote ti vir lo pavaz dan lakour eksteryer avek son koulwar lo trwa letaz.

⁴ Devan bann lasal, lo kote lakour ki ti vir par anndan, ti annan en lale ki ti 50 met longer e senk met larzer. Son lantre ti lo kote Nor.

⁵ Bann lasal lo trwazyenm letaz ti pli pti ki bann lo lezot letaz, akoz koulwar lo trwazyenm letaz, ti pli larz ki lo lezot letaz.

⁶ Parlao, lo tou le trwa letaz, ti annan balkon. Zot pa ti tenir lo kolonn parey lezot batiman, me lasal ti antre, anmezir ou monte.

⁷ Lo kote lakour eksteryer, miray ki ti tou dilon bann lasal ti mezir 25 met longer.

⁸ Bann lasal ti mezir 25 met. Par kont, bann lasal ki ti vir lo kote tanp, ti mezir 50 met longer.

⁹ Anba bann lasal, lo kote Les batiman, ti annan en lantre pour bann ki sorti dan lakour

¹⁰ Lantre ti la kot miray lakour i konmanse. Lo kote Sid, ti osi annan bann lasal ki vir lo lakour ek batiman ki ti deryer tanp.

¹¹ Par devan bann lasal, ti annan en lale. Sa bann lasal ti egzakteman parey sa ki ti lo kote Nor: Zot dimansyon, zot pozisyon, laport antre ek sorti, tou ti parey.

¹² Anba bann lasal lo kote Sid, ti annan en lantre dan Les en koulwar vizavi miray ki protez lasal sen.

¹³ Sa zonm ti dir mwan: Bann lasal ki vir lo kote Nor e lo kote Sid i bann lasal sakre, kot bann pret ti prezant devan SENYER, pour manz bann lofrann tre sakre. La kot zot met bann lofrann tre sen: Bann lofrann vezetal ek zannimo ofer pour diferan sakrifis pour pardon pese, akoz sa landrwa i sen.

¹⁴ Bann pret ki antre dan sanktyer pa devre sorti direkteman dan lakour. Zot devre kit zot lenz sakre ki zot mete pour servi SENYER dan lasal. Zot devre met zot lenz ordiner avan al dan landrwa kot lepep i rasanble.

Dimansyon Lakour Tanp

¹⁵ Kan i ti'n fini mezir enteryer tanp, i ti fer mwan sorti par en laport ki vir lo kote Les, e i ti mezir lakour otour tanp.

¹⁶ I ti mezir lo kote Les avek son baton: 250 met.

¹⁷ I ti mezir kote Nor; la osi ti 250 met.

¹⁸ I ti mezir kote Sid avek son baton: 250 met.

¹⁹ Apre, i ti mezir lo kote Was; la osi ti 250 met.

²⁰ I ti mezir tou le kat kote. Toultour ti annan miray: 250 met longer e 250 met larzer ki ti separ lespas sakre avek lespas ordiner.