Ezekyel 2 - Labib An Kreol Seselwa

Bondye I Apel Ezekyel koman Profet

¹ I ti dir mwan: Ou ki en imen, debout! Mon oule koz avek ou.

² Kan i ti koz avek mwan, en lespri ti antre dan mwan e met mwan lo mon lipye; mon ti ekout li koze.

³ I ti dir mwan: Ou ki en imen, mon pe anvoy ou kot bann Izraelit, ver bann rebel ki'n revolte kont mwan; zot ek zot bann zanset in revolte ziska ozordi.

⁴ Mon pe anvoy ou kot sa pep antete e ki annan leker dir. Dir zot: La sa ki Senyer BONDYE i deklare:

⁵ Si zot ekoute oubyen zot refize ekoute, omwen, zot ava konnen ki i annan en profet parmi zot. Annefe, zot en pep rebel.

⁶ Alor, ou ki en imen, pa per zot, ni parol ki zot dir; ou antoure avek zarbis rons ek pikan, oubyen asiz lo bann skorpyon. Me pa per sa ki zot dir, ni les lekspresyon zot figir efrey ou, akoz zot en ras rebel.

⁷ Ou ava repet parol ki mon dir ou, menm si zot ekoute oubyen pa ekout ou, akoz zot en pep rebel.

⁸ Me ou ki en imen, ekout sa ki mon pou dir ou: Pa bezwen ki ou revolte kont mwan parey sa pep rebel. Ouver ou labous e manz sa ki mon pou donn ou.

⁹ Ler mon ti gete, mon ti war en lanmen ki ti pe prezant mwan en liv.

¹⁰ I ti deroul li devan mwan; lo de kote, ti'n ekri: Lamantasyon, konplent, zemisman!