Ezekyel 11 - Labib An Kreol Seselwa

Zizman lo Zerizalenm

¹ Lespri SENYER ti soulev mwan e anmenn mwan kot laport tanp lo kote Les. La, devan laport, ti annan 25 zonm. Parmi zot, mon ti war Yazanya, garson Azour, ek Pelatya, garson Benaya, de sef lepep.

² Lespri ti dir mwan, “Ou ki en imen, la bann zonm ki manigans bann plan pour fer dimal e ki donn move konsey dan sa lavil.

³ Zot dir: Nou pa pou konstri bann lakaz desito. Lavil i parey en marmit e nou, nou koman lavyann ladan.

⁴ Alor, profetiz kont zot. Ou ki en imen, profetiz kont zot.”

⁵ Lespri SENYER ti sezi mwan e dir mwan: Dir: La sa ki SENYER i deklare: Mon konnen ki mannyer ou koze, pep Izrael. Mon konnen sa ki ou mazinen.

⁶ Ou'n touy en kantite dimoun dan sa lavil e ou'n ranpli bann semen avek kadav.

⁷ Alor, la sa ki Senyer BONDYE i deklare: Ou'n fer lavil vin en marmit e bann ki ou'n touye in vin lavyann ladan. Me ou, ou pou ganny sase dan sa lavil.

⁸ Ou per lepe! La mon dir ou: Mon pou anvoy lepe kont ou. Mwan, Senyer BONDYE ki'n deklare.

⁹ Mon pou sas ou dan Zerizalenm e livre ou dan lanmen bann etranze. Mon pou egzekit mon bann zizman kont ou.

¹⁰ Mon pou ziz teritwar Izrael e fer ou ganny masakre. Alor, ou ava konnen ki mwan menm SENYER.

¹¹ Lavil Zerizalenm pa pou vin en marmit pour ou, e ou, lavyann ladan; me mon pou ziz ou dan teritwar Izrael.

¹² Alor, ou ava konnen ki mwan menm SENYER. Ou pa'n swiv mon bann regleman, ni mon bann desizyon, me ou'n swiv regleman bann nasyon ki otour ou.

¹³ Pandan ki mon ti pe transmet sa mesaz, Pelatya, garson Benaya ti mor. Alor, mon ti tonm lafas ater e mon ti kriy byen for, “Senyer BONDYE eski ou pou fer disparet leres pep Izrael?”

Promes Bondye pour bann Egzile

¹⁴ SENYER ti koz avek mwan:

¹⁵ Ou ki en imen, zot ou bann frer, ou bann prop fanmir e konpatriyot Izraelit, gete ki bann zabitan Zerizalenm i'n dir lo zot: Reste lwen avek prezans SENYER. I'n donn nou posesyon sa pei.

¹⁶ Alor, ou ava dir zot: La sa ki Senyer BONDYE i deklare: Menm si mon'n dispers zot lwen dan bann pei, parmi bann nasyon etranze, mon'n touzour reste prezan en pe letan parmi zot dan bann pei partou kot zot in ale.

¹⁷ Alor, ou ava dir zot: La sa ki Senyer BONDYE i deklare: Mon pou tir zot dan tou sa bann pei kot zot in disperse, e rasanble zot. Mon pou donn zot later Izrael.

¹⁸ Kan zot ava'n retournen, mon pou fer disparet bann pratik degoutan ek bann lobze degoutan.

¹⁹ Mon pou donn zot tou en menm leker. Mon pou met dan zot en nouvo lespri. Mon pou retir dan zot, sa leker ros e donn zot en leker laser.

²⁰ Konmsa, zot ava obei mon komannman e met an pratik mon bann regleman. Zot ava vin mon pep e mwan, mon ava zot Bondye.

²¹ Me bann ki zot leker i reste atase avek bann pratik degoutan ek bann lobze degoutan, zot pou sibir konsekans zot prop aksyon. Mwan Senyer BONDYE ki deklare.

Laglwar Bondye I Kit Zerizalenm

²² Alor, bann seriben ki annan bann larou akote zot, ti ouver zot lezel. Laglwar Bondye Izrael ti briy lo zot.

²³ Apre, laglwar SENYER ti monte sorti dan milye lavil e aret lo montanny ki dan Les lavil.

²⁴ Lespri ti soulev mwan e anmenn mwan dan vizyon par lespri Bondye, ziska kot bann egzile dan Babilonn. Alor, vizyon ki mon ti'n war ti disparet.

²⁵ Alor, mon ti dir bann egzile tou sa ki SENYER ti'n revel mwan.