Ezekyel 1 - Labib An Kreol Seselwa

Tronn Bondye

¹ Dan senkyenm zour, katriyenm mwan, trantyenm lannen, mon ti parmi bann egzile lo bor larivyer Kebar. Mon ti war lesyel ouver e mon ti war bann vizyon sorti kot Bondye.

² Sa ti ariv senkyenm zour le mwan, dan senkyenm lannen apre deportasyon lerwa Yoakin,

³ kan SENYER ti adres son parol avek pret Ezekyel, garson Bouzi, lo bor larivyer Kebar, dan Babilonn. SENYER ti poz son lanmen lo li.

⁴ Kan mon ti gete, en rafal divan ti soufle sorti dan Nor e anmenn avek li en gro nyaz; en rebor lalimyer ti ilimin lesyel otour li. Laflanm dife ti sorti dan son milye; i ti klate parey bronz ki pe fonn dan dife.

⁵ Dan son milye ti sorti sa ki ti resanble kat et vivan ki ti annan resanblans e laform imen.

⁶ Zot ti annan kat figir ek kat lezel sakenn.

⁷ Zot lazanm ti drwat; zot lipye ti parey sabo bef ki ti briye parey bronz poli.

⁸ Anba zot lezel, zot ti annan lanmen parey lanmen imen.

⁹ Zot bout lezel ti tous avek kanmarad e zot ti mars drwat devan, san tourn zot lekor.

¹⁰ Figir zot tou le kat, devan ti parey en figir imen; lo kote drwat, ti parey en lyon; lo kote gos ti parey en bef e deryer ti resanble en leg.

¹¹ Zot lezel, de ti ouver e zot bout ti tous ansanm anler, de lot ti kouver zot lekor.

¹² Zot ti mars drwat devan; zot ti al drwat kot lespri ti gid zot san bezwen tournen.

¹³ Parmi sa bann et vivan, ti annan en keksoz ki ti resanble labrez dife. I ti parey bann flanbo ki ti pe bouze toultan. Dife ti briye e zekler ti fannen.

¹⁴ Bann et vivan ti pe ale vini osi vit ki zekler.

¹⁵ Pandan ki mon ti pe get sa bann et vivan, mon ti war en larou lo later akote sak et vivan, en larou pour sakenn.

¹⁶ Tou le kat larou ti annan menm laform. Zot ti briye parey pyer presyez. Lafason ki zot ti'n ganny konstri ti paret konmsi zot ti enn dan lot.

¹⁷ Zot ti bouz dan nenport kat direksyon san bezwen vire lo zot pivo.

¹⁸ Zot rebor toultour ti gran e efreyan e ti annan bann lizye klate toultour.

¹⁹ Kan bann et vivan ti deplase, tou bann larou ti deplas akote zot; kan bann et vivan ti mont anler, bann larou osi ti monte.

²⁰ Partou kot lespri ti ale, zot osi zot ti ale e bann larou osi. Kan zot ti monte, bann larou ti mont avek zot, akoz lespri bann et vivan ki ti dan sa bann larou.

²¹ Sak fwa ki zot ti bouz devan, arete, oubyen monte, bann larou osi ti fer menm mouvman: Swa arete, oubyen mont avek zot, akoz lespri ti dan bann larou.

²² Parlao latet bann et vivan ti annan sa ki ti resanble en twa ki ti klate parey kristal.

²³ Anba sa twa, sak et vivan ti annan de lezel ki ti ouver e sak bout ti tous kanmarad e de lot lezel ti kouver zot lekor.

²⁴ Kan zot ti deplase, mon ti antann tapaz zot lezel ki ti parey tapaz gro lanmer, for parey lavwa Bondye Toupwisan. Kan zot ti bouze, ti paret konmsi mouvman en gran larme. Kan zot ti arete, zot ti zis ferm zot lezel.

²⁵ Ti annan en lavwa sorti par lao twa par lao zot latet. Kan zot ti aret bouze, zot ti repliy zot lezel.

²⁶ Zis par lao sa twa ki ti lo zot latet, ti annan en lobze parey safir e ki ti resanble en tronn; par lao tronn, ti annan en laform ki ti resanble en imen.

²⁷ Mon ti war depi son leren ziska anba, ti klate parey dife e ti briye toultour.

²⁸ Sa lalimyer otour li ti parey en larkansyel dan nyaz apre en zour lapli. I ti reflekte laglwar SENYER. Kan mon ti war sa, mon ti tonm lafas ater e mon ti antann en lavwa.