Ezai 59 - Labib An Kreol Seselwa

Profet I Kondann Pese Lepep

¹ Pa krwar lebra SENYER i tro kourt pour li pa kapab sove; ni son zorey tro dir pour li pa tande.

² Me plito ou bann fot ki'n separ ou avek ou Bondye; ou bann pese ki'n fer li kasyet son figir e ki'n anpes li antann ou.

³ Annefe, zot annan disan lo zot lanmen; zot ledwa i sal avek pese. Zot labous i koz lalang; zot lalang i mirmir lenzistis.

⁴ Personn pa port plent dapre lazistis; personn pa defann dapre laverite; zot pled dan vid, zot koz manti; zot konsevwar sa ki mal e zot anmenn maler.

⁵ Zot fer eklo dizef serpan e fer lakaz bib. Sa ki manz enn sa dizef i mor; si ou kraz enn sa dizef, en pti serpan ki sorti.

⁶ Lakaz bib pa ase pour fer lenz; i pa ni ase pour zot kouver zot avek sa ki zot fer. Rezilta zot travay i koz zis maler; zot lanmen i ranpli avek aksyon vyolan.

⁷ Zot lipye i prese pour al fer sa ki mal; zot degaze pour fer koule disan inosan; zot mazin zis fer sa ki mal; zot semen i borde avek dezas ek dezolasyon.

⁸ Zot pa konn semen lape; zot pa les okenn tras lazistis deryer zot. Zot in fer semen ki ranpli avek kontour; sa ki pran sa semen pa konnen kisisa lape.

Lepep I Konfes Son Pese

⁹ Pour sa rezon ki lazistis i reste lwen avek nou e lazistis pa ariv ziska kot nou. Nou esper lalimyer, me i annan zis fernwanr. Nou esper lizour, me nou pe mars dan teneb.

¹⁰ Nou marse parey en aveg tou dilon en miray; nou pe tatonnen parey dimoun ki pa war kler; nou ganny konnyen lizour koman aswar; Nou an bonn sante, me nou parey dimoun mor.

¹¹ Nou tou, nou gronnyen parey lours; nou pa arete roukoule parey pizon. Nou esper lazistis, me i pa vini; nou esper nou delivrans, me i reste lwen avek nou.

¹² Tou nou fot i la devan ou e nou bann pese i akiz nou. Nou bann fot pa kit nou e nou konn byen nou fot.

¹³ Nou'n revolte e nou'n dezobei SENYER; nou'n trai li e nou pa'n swiv nou Bondye. Nou'n koz lopresyon ek revolt; nou'n konsevwar bann mansonz ki nou'n medite dan fon nou leker.

¹⁴ Pour sa rezon, lazistis pa'n progrese e ladrwatir in rekile; laverite i ganny dezonore dan plas piblik e napa plas pour lonnekte.

¹⁵ Laverite in disparet; sa enn ki oule reste onnet i ganny depouye. SENYER in war li e in mekontan ki ti napa lazistis.

Senyer I Pare pour li Sov Son Pep

¹⁶ I ti war ti napa personn e i ti tris ki ti napa personn pour entervenir. Alor, son lebra ti donn li laviktwar; son lazistis ki ti soutenir li.

¹⁷ I met lazistis koman en zile proteksyon; lo son latet i met kas delivrans. I abiy li dan lenz vanzans e anvlop li dan palto zalouzi.

¹⁸ I ava rann sakenn dapre sa ki i merite; montre gro lakoler kont son bann ladverser e vanz kont son bann lennmi, menm kont zabitan bann zil.

¹⁹ Alor, depi dan Was, dimoun pou respekte non SENYER, depi dan Les, son laglwar; akoz i pou vini parey en larivyer deborde, pouse par souf SENYER.

²⁰ SENYER i deklare: I pou antre dan Siyon koman Sover pour bann ki sorti kot Zakob ki'n aret revolte.

²¹ SENYER i deklare: Kanta mwan, la lalyans ki mon fer avek zot: Mon lespri ki lo ou, mon parol ki mon'n met dan ou labous, pa pou ganny tire ni dan ou labous, ni dan labous ou bann zanfan, ni ou desandan, ozordi e pour touzour. SENYER ki deklare.