Ezai 43 - Labib An Kreol Seselwa

Bondye I Promet pour Sov Son Pep

¹ Aprezan, la sa ki SENYER i deklare; Zakob! Mwan ki'n kree ou! Izrael! Mwan ki'n form ou! Pa bezwen per! Mwan ki'n sov ou! Mon'n apel ou par ou non: Ou pour mwan!

² Si ou travers lanmer, mon pou avek ou; si ou travers bann gran larivyer, ou pa pou ganny trennen. Si ou mars atraver dife, ou pa pou ganny brile, e bann laflanm pa pou fer ou dimal,

³ akoz mwan menm SENYER ou Bondye, Bondye Sen Izrael, ou Sover. Mon'n donn Lezip koman en ranson pour ou delivrans. Mon'n esanz Letyopi ek Seba dan ou plas.

⁴ Ou annan gran valer pour mwan. Ou presye pour mwan e mon kontan ou. Pour sa rezon, mon donn bann pep dan ou plas e bann nasyon an retour pour ou lavi.

⁵ Pa bezwen per, akoz mon avek ou! Mon pou fer ou desandans retournen sorti dan Les. Mon pou rasanble lezot ki dan Was.

⁶ Avek Nor, mon pou dir: Rann zot! Avek Sid: Pa gard zot! Retourn mon bann garson ki dan pei lwenten e mon bann fiy ki dan bout later.

⁷ Retournen, zot tou ki port mon non, zot ki mon'n kree pour mon laglwar, ki mon'n formen e fer.

Izrael I Temwen Senyer

⁸ Anmenn bann ki aveg e ki pourtan zot annan lizye; bann ki sourd e ki pourtan zot annan zorey!

⁹ Reini tou bann nasyon! Rasanble tou bann pep! Lekel parmi zot ti deklare e dir nou davans sa ki ti pou arive? Anmenn zot bann temwen pour prouve ki zot annan rezon! Annou les bann temwen ekout zot e dir: Sa i vre!

¹⁰ SENYER i deklare: Zot mon bann temwen e mon serviter ki mon'n swazir pour zot konn mwan e krwar dan mwan, konpran ki mwan menm sel Bondye. Avan mwan, ti napa okenn Bondye. Apre mwan, pa pou annan okenn lot.

¹¹ Mwan, zis mwan ki SENYER; apar mwan, napa en lot ki kapab sov ou.

¹² La sa ki SENYER i deklare: Mwan ki'n anonse sa ki pou arive e sov zot. Mwan ki'n fer zot konn mon mesaz, non pa okenn bondye etranze ki zot ti annan parmi zot. Alor, zot mon temwen.

¹³ Depi touzour, mwan menm Bondye. Personn pa kapab aras sa ki anba mon pouvwar. Mon azir, e personn pa kapab anpes mwan.

Lepep I Ganny Delivre dan Babilonn

¹⁴ La sa ki SENYER ou Sover, Bondye Sen Izrael, i deklare: Akoz ou, ki mon pou anvoy en dimoun kont Babilonn. I pou defons tou bann laport lavil e bann selebrasyon bann Kaldeen pou tourn an lamantasyon.

¹⁵ Mwan menm SENYER, ou Bondye Sen, Kreater Izrael, ou Lerwa.

¹⁶ La sa ki SENYER i deklare: Sa enn ki ouver en semen dan lanmer, en santye atraver bann gro laroul,

¹⁷ ki fer sorti kales lager ek son seval, larme ek son bann konbatan: Zot alonze e zot nepli kapab leve; zot toufe e tennyen parey en lanmes lalanp.

¹⁸ Pa mazin sa ki'n pase ni tenir kont bann levennman lepase.

¹⁹ Mon pe al fer keksoz nouvo; deza i pe konmans bourzonnen; ou devre rekonnet! Mon pou tras semen dan dezer e fer sours delo koule dan bann landrwa sek.

²⁰ Bann zannimo sovaz pou loue mwan; sakal ek lotris pou onor mwan, akoz mon'n fer delo koule dan dezer e larivyer dan landrwa sek, pour ki mon pep ki mon'n swazir ava kapab bwar.

²¹ Sa pep ki mon'n formen zis pour mwan ava sant mon louanz.

Pese Izrael

²² Pourtan! Zakob, ou pa ti apel mwan. Izrael, ou'n fatige avek mwan.

²³ Ou pa'n anmenn ou mouton pour ofer mwan bann sakrifis konplet, ni onor mwan avek ou bann sakrifis. Mon pa'n obliz ou ofer bann lofrann ni fatig ou pour ofer lansan.

²⁴ Ou pa'n depans larzan pour aste bann plant parfimen pour mwan. Ou pa'n fer mwan rasazye ek lagres ou bann sakrifis. Me ou'n fer mwan vin lesklav ou bann pese; ou'n fatig mwan avek ou bann move aksyon.

²⁵ Pourtan, mwan, mwan menm, par mon prop pwisans, mon pardonn tou ou fot e mon pou oubliy tou ou bann pese.

²⁶ Fer mwan rapel kwa ou repros mwan! Annou al devan ziz. Prezant ou ka e prouve ki ou annan rezon.

²⁷ Ou bann premye paran ti fer pese; ou bann sef ti revolte kont mwan.

²⁸ Alor, mon'n dezonor bann sef ki ti dan sanktyer. Mon'n livre Zakob pour li ganny detri konpletman e Izrael pou fini dan laont.