Ezai 42 - Labib An Kreol Seselwa

Serviter Senyer

¹ Mon prezant mon serviter ki mon tenir par lanmen; mon'n swazir li avek lazwa. Mon'n fer mon lespri repoz lo li pour ki i pratik lazistis devan bann nasyon.

² I pa pou kriye ni lev lavwa; personn pa pou antann son lavwa dan semen.

³ I pa pou kas en sel banbou; i pa pou tenny en lanmes ki ankor pe sorti lafimen. I pou fidelman fer konn lazistis.

⁴ I pa pou dekouraze ni abandonnen, ziska ki i etabli lazistis lo later; bann pei lwenten pe esper son lansennyman.

⁵ La sa ki Bondye i deklare, SENYER ki'n kree lesyel dan tou son grander; ki'n fer later avek tou son vezetasyon; ki donn lavi tou son bann zabitan, e son souf, tou sa bann ki viv lo later.

⁶ Mwan SENYER, mon'n apel ou dapre lazistis. Mon'n pran ou par lanmen e protez ou; mon'n swazir ou pour ou vin en lalyans pour lepep, en lalimyer pour bann nasyon,

⁷ pour ou ouver lizye bann aveg, pour ou liber bann prizonnyen ki dan kaso, e fer sorti an konsiny bann ki reste dan fernwanr.

⁸ Mwan menm SENYER, sa i mon non. Mon pa les personn pran mon laglwar, ni les bann zidol pran loner ki pour mwan.

⁹ Bann premye levennman ki'n ganny anonse in fini pase. Aprezan, mon anons sa ki nouvo: Mon fer ou konnen avan menm zot arive.

En Kantik Louanz

¹⁰ Sant en nouvo kantik an loner SENYER! Sant son louanz depi dan bout later! Loue li! Zot ki vwayaz lo lanmer e zot zabitan bann zil!

¹¹ Dezer ek bann lavil! Lev zot lavwa. Bann vilaz osi kot Kedar i reste. Bann zabitan Sela! Sant zot lazwa. Kriye depi lo latet bann montanny!

¹² Zot tou! Rann glwar SENYER. Bann zil! Sant son louanz.

¹³ SENYER i avanse parey en ero; parey en gerye, i montre son lakoler; i kriy for, i donn en lavertisman lager; i lans defi kont son bann lennmi.

Bondye I Promet pour Ed son Pep

¹⁴ Depi en bon pe letan mon pe reste trankil. Mon pa'n dir nanryen, mon'n gard silans. Me aprezan, parey en fanm dan douler lakousman, mon pou kriye, mon pou plennyen, mon pou soufle akoz mon pa kapab byen respire.

¹⁵ Mon pou detri bann montanny ek bann kolin e fer sek tou sa ki pouse. Mon pou fer bann larivyer vin zil e fer sek bann lanmar.

¹⁶ Mon pou kondwir bann aveg lo en semen ki zot pa konnen. Mon pou gid zot lo bann santye ki zot pa'n konnen. Devan zot, mon pou fer fernwanr vin lalimyer, bann semen abos pou vin en laplenn nivo. Mon pou fer tousala; mon pa pou abandonn zot.

¹⁷ Sa bann ki met zot konfyans dan bann zidol, ki dir avek zot bann stati: Zot menm nou bondye, zot pou ganny rezete, zot pou dan laont!

¹⁸ Bann ki sourd! Ekoute. Bann ki aveg! Ouver zot lizye, gete.

¹⁹ Sa enn ki aveg, li menm mon serviter. Sa enn ki sourd, li menm mon mesaze ki mon'n anvoye. Lekel ki aveg parey mon mesaze devoue? Lekel ki sourd parey serviter SENYER?

²⁰ I war en kantite keksoz, me i pa fer atansyon. Son zorey i ouver, me i pa tande.

²¹ Akoz son lazistis, SENYER i pran plezir pour rann son lansennyman gran e manifik.

²² Me sa pep i en pep ki'n ganny vole e depouye. Zot tou zot in pri dan trou e fermen dan prizon. Zot in vin viktim san ki personn i kapab sov zot. Zot in ganny vole, me personn pa dir: Rann sa!

²³ Lekel parmi zot pou ekout sa? Lekel ki pou port atansyon e ekout sa ki pou arive?

²⁴ Lekel ki'n livre Zakob avek sa ki pe depouy li e Izrael avek bann voler? Eski pa kont SENYER ki nou'n fer pese? Zot pa'n oule swiv son semen, ni obei son bann komannman.

²⁵ Pour sa rezon ki i devers lo son pep larder son lakoler e vyolans lager. I'n met dife partou, me zot pa'n oule konpran; i'n bril tou, me zot pa'n pran kont.