Ezai 3 - Labib An Kreol Seselwa

Dezord dan Zerizalenm

¹ Aprezan, Senyer, SENYER liniver pou retir dan Zerizalenm e dan Zida tou resours. I pou priv zot avek manze ek delo,

² konbatan ek gerye, ziz ek profet, deviner ek ansyen,

³ sef group 50 ek personnaz enportan, konseye ek mazisyen abil, sorsye eksperyanse.

⁴ Alor, bann zanfan pou vin zot sef; manrmay ava gouvern zot.

⁵ Dimoun pou ganny kraze vwazen kont vwazen. Bann zenn pou ensolan anver bann vyeyar; bann bonnaryen pou maltret dimoun respektab.

⁶ En zonm ava sezi enn dan son fanmir e dir li: Ou annan en bon palto alor ou ava vin nou sef; pran ansarz sa ta debri.

⁷ Me sa zour, sa dimoun pou lev lavwa e dir: Mon pa en dokter. Napa ni manze ni lenz dan mon lakaz. Ou pa kapab fer mwan sef.

⁸ Zerizalenm in degrengole; rwayonm Zida in tonbe, akoz zot parol ek zot aksyon in kont SENYER. Zot in revolte devan son laglwar.

⁹ Zot move aksyon i en temwen kont li. Zot montre zot pese parey Sodonm. Maler! Zot loter zot prop maler.

¹⁰ Dir sa ki inosan koman i ere, akoz i pou rekolte fri son travay.

¹¹ Maler lo zot bann malfeter! Tou pou mal fini pour zot. Zot pou ganny trete dapre zot aksyon.

¹² Zanfan ki pe kraz mon pep; fanm ki pe domin zot. Mon pep! Ou bann sef pe tronp ou. Zot pe anmenn ou dan move semen.

Senyer I Ziz son Pep

¹³ SENYER in pare pour zizman. In debout pour li ziz lepep.

¹⁴ SENYER i pare pour ziz bann ansyen ek bann dirizan son pep: Zot ki'n devaste mon plantasyon rezen, zot lakaz i plen avek keksoz ki zot in vole avek bann pov.

¹⁵ Senyer BONDYE liniver i deklare: Akoz ou kraz mon pep? Akoz ou fer vyolans avek bann pov?

Lavertisman pour bann Fanm Zerizalenm

¹⁶ SENYER i deklare: Bann fiy dan Zerizalenm zot fyer, zot fil zot likou ler zot marse, zot regar i provokan; zot mars ti lepa e fer sonnen bann lasenn ki dan zot sevir.

¹⁷ SENYER pou kouver latet bann fiy Zerizalenm avek lagal e met zot fron deor.

¹⁸ Sa zour, SENYER pou tir tou zot bizou: Lasenn dan sevir, rezil,

¹⁹ zanno, brasle, vwalet;

²⁰ vwal, sennon, sang, gardkor, port boner,

²¹ bag ek bag nennen;

²² lenz lafet, foular, lesarp, kaba;

²³ semiz linenn, vwal.

²⁴ Loder pouritir pou ranplas loder lesans; en lakord pou ranplas en sang. Latet kler pou ranplas bann lanmod pennyen avek ekstravagans; lenz dey pou ranplas bann lenz lafet; laont dan plas labote.

²⁵ Ou bann zonm pou ganny masakre e ou bann gerye pou mor dan batay.

²⁶ Zot bann laport pou plennyen e lamante; i pou asiz ater, parey en fanm depouye.