Ester 1 - Labib An Kreol Seselwa

Lerwa Zerzes I Donn en Gran Festen

¹ Sa ti ariv dan letan Zerzes, sa menm lerwa Zerzes ki ti renny lo 127 provens, depi Lenn ziska Letyopi.

² Dan sa lepok, lerwa Zerzes ti renny lo son tronn rwayal dan Siz, son kapital.

³ Dan trwazyenm lannen son renny, i ti donn en festen pour tou son bann o fonksyonner ek son bann minis. Bann sef larme Lapers ek Medi, bann nob, bann gouverner provens, ti prezan.

⁴ I ti montre gran larises son rwayonm e splander ek son mazeste pandan plizyer zour. An tou 180 zour.

⁵ Alafen sa bann zour, lerwa ti donn pandan set zour, en festen o plenn er dan zarden rwayal, pour lepep antye ki ti dan Siz, son kapital, depi pli gran ziska pli pti.

⁶ Ti annan bann rido latwal koton kouler blan ek ble, atase avek bann kordon an linenn blan e vyolet, ki'n pas dan bann bag annarzan, fikse avek bann kolonn an marb. Ti annan osi bann divan annor e annarzan lo en pave mozaik an marb, nak ek marb nwanr.

⁷ Bann labwason ti ganny servi dan bann lakoup annor, dan diferan laform; diven sorti kot lerwa ti annabondans.

⁸ Sak envite ti kapab bwar kantite ki i ti anvi. Annefe, lerwa ti'n donn lord tou bann serviter dan son pale, pour satisfer dezir sak envite.

⁹ Larenn Vasti ti osi donn en festen pour bann fanm, dan pale lerwa Zerzes.

Afron Larenn Vasti

¹⁰ Setyenm zour lafet, kan i ti'n konmans soule avek diven, lerwa ti apel Mehoumann, Bizta, Harbona, Bigta, Abagta, Zetar ek Karkas, set enik ki ti dan servis lerwa Zerzes.

¹¹ I ti donn zot lord fer larenn Vasti vin devan li, abiye dan son kouronn rwayal, pour montre son labote avek bann pep, bann o fonksyonner. Annefe, larenn ti en zoli fanm.

¹² Me larenn Vasti ti refize obeir lord ki lerwa ti'n transmet par lentermedyer son bann enik. Lerwa ti pran en gran lakoler.

¹³ Lerwa ti konsilte son bann saz ki ti konn byen lalwa. Annefe, bann zafer rwayal, ti touzour ganny regle avek led bann dimoun ki konn lalwa ek bann koutim.

¹⁴ Parmi bann konseye pros avek lerwa, ti annan Karsena, Setar, Admata, Tarsis, Meres, Marsena ek Memoukann. Sa set konseye Lapers ek Medi ki ti pros avek lerwa e okip bann premye plas dan rwayonm.

¹⁵ Lerwa ti demann zot: Dapre lalwa, ki fodre fer avek larenn Vasti ki pa'n obei lord ki lerwa Zerzes ti'n donnen par lentermedyer bann enik?

¹⁶ Alor, Memoukann ti dir an prezans lerwa ek bann o fonksyonner, “Larenn Vasti pa'n fer ditor zis lerwa, me osi tou bann fonksyonner enportan e tou lepep dan bann provens lerwa Zerzes.

¹⁷ Annefe, tou bann fanm pou konn aksyon larenn; sa pou fer zot mepriz zot mari, akoz zot pou dir: Lerwa Zerzes in ordonn larenn Vasti pour prezant devan li e i pa'n vini.

¹⁸ Ozordi menm, fanm bann sef Lapers ek Medi ki'n okouran konportman larenn, pou revolte kont bann zofisye lerwa e sa pou anmenn mepri ek lakoler.

¹⁹ Si sa i paret bon pour ou, Mazeste, lerwa, fer en deklarasyon ki pa kapab sanze, ki ganny ekri dan bann lalwa Medi ek Lapers, ki Vasti napa drwa vin ankor kot lerwa Zerzes, ki lerwa i donn son tit rwayal avek en lot fanm ki pli merite ki li.

²⁰ Kan sa deklarasyon enportan ava'n ganny pibliye par lerwa partou dan son gran rwayonm, tou bann fanm ava annan respe pour zot mari, depi pli gran ziska pli pti.”

²¹ Sa deklarasyon ti fer plezir lerwa ek bann fonksyonner, e lerwa ti azir dapre sa ki Memoukann ti'n propoze.

²² I ti anvoy bann let dan tou bann provens rwayal, dan sak provens dapre son lekritir e sak pep dapre son langaz, ki deklare ki tou zonm i devre sef dan son prop lakaz e zot devre servi lalang maternel.