Esdras 7 - Labib An Kreol Seselwa

Esdras I Ariv Zerizalenm

¹ Apre sa, pandan renny Artakzerzes, lerwa Lapers, en zonm ki ti apel Esdras, ti ariv Zerizalenm. I ti garson Seraya, garson Azarya, garson Hilkiya,

² garson Saloum, garson Sadok, garson Ahitoub,

³ garson Amaria, garson Azarya, garson Merayot,

⁴ garson Zeraya, garson Ouzi, garson Bouki,

⁵ garson Abisoua, garson Fineas, garson Eleazar, garson Gran-Pret Aaron.

⁶ Sa Esdras ki sorti Babilonn, ti en skrib, eksper dan lalwa Moiz ki SENYER, ki Bondye Izrael ti donn li. Lanmen SENYER, son Bondye, ti avek li; lerwa ti donn li tou sa ki i ti demande.

⁷ Dan setyenm lannen renny lerwa Artakzerzes, serten parmi bann Izraelit, pret, levit, santer, portye, ek serviter tanp, ti osi mont Zerizalenm.

⁸ Zot ti ariv Zerizalenm dan senkyenm mwan, setyenm lannen renny sa lerwa.

⁹ Depar pour sorti Babilonn ti'n ganny fikse pour premye zour, dan premye mwan, e zot ti ariv Zerizalenm premye zour, senkyenm mwan, e lanmen son Bondye ti avek li.

¹⁰ Esdras ti'n met tou son leker dan letid lalwa SENYER, met li an pratik e ansenny dan Izrael tou bann lalwa ek regleman.

Artakzerzes I Konfye Esdras En Travay

¹¹ La kopi let ki lerwa Artakzerzes ti donn pret ek ekriven Esdras, eksper dan tou sa ki konsern komannman SENYER ek bann regleman pour Izrael:

¹² Artakzerzes, lerwa tou bann lerwa, pour Esdras, ekriven e eksper dan lalwa Bondye lesyel! Lape!

¹³ Mon'n ordonnen ki tou dan pep Izrael, pret oubyen levit ki dan mon rwayonm, ki anvi al Zerizalenm, zot lib pour al avek ou.

¹⁴ Alor, mwan lerwa, avek mon set konseye, nou anvoy ou Zerizalenm e dan distrik Zida, pour war koman lalwa Bondye ki son teks ou anmenn partou avek ou, pe ganny respekte.

¹⁵ Ou ava osi anmenn larzan ek lor ki mwan ek mon bann konseye nou dezire ofer Bondye Izrael ki son demer i Zerizalenm.

¹⁶ Ou ava osi anmenn tou lor ek larzan ki ou ava kapab trouve dan provens Babilonn antye ek bann lofrann volonter ki lepep, ek bann pret in ofer pour tanp zot Bondye ki Zerizalenm.

¹⁷ Alor, avek sa larzan, ou ava aste toro, mouton mal ek zenn mouton; ou ava osi aste tou lofrann vezetal ek lofrann labwason ki al avek. Ou ava ofer tousala lo lotel tanp ou Bondye ki Zerizalenm.

¹⁸ Avek leres larzan, fer sa ki ou war bon ou avek ou bann frer, me touzour dapre lavolonte ou Bondye.

¹⁹ Depoz devan Bondye ki Zerizalenm tou bann lobze ki nou'n remet ou pour servis tanp ou Bondye.

²⁰ Ou ava pran dan trezor rwayal tou sa ki neseser pour tou lezot depans ki ou ava fer an rapor avek tanp ou Bondye.

²¹ Mwan, lerwa Artakzerzes, mon donn sa lord tou bann trezorye dan provens lo lot kote Larivyer: Zot ava donn Esdras, pret e ekriven lalwa Bondye lesyel, tou sa ki i demann zot,

²² ziska trwa tonn larzan, 30 tonn dible, 4,000 lit diven, 4,000 lit delwil e tou disel ki i bezwen.

²³ Tou sa ki'n ganny ordonnen par Bondye lesyel pour tanp Bondye, i devre ganny byen egzekite avek bokou swen, pour ki son lakoler pa tonm lo rwayonm lerwa e lo son bann garson.

²⁴ Pour sa rezon, nou fer zot konnen ki zot napa drwa enpoz okenn taks, ni drwa ladwann, ni drwa pasaz lo okenn pret, levit, santer, portye, ni okenn dimoun ki travay dan tanp.

²⁵ Kanta ou, Esdras, dapre lasazes ou Bondye ki ou posede, etabli bann ziz ek mazistra pour ki zot rann lazistis lo tou dimoun ki reste lo lot kote larivyer Efrat e tou bann ki konn lalwa ou Bondye; ansenny sa bann ki pa konnen.

²⁶ Bann dimoun ki pa obei lalwa ou Bondye e lalwa lerwa pou ganny swa kondannen anmor, swa anvoye annegzil, swa konfiskasyon son bann byen, swa ganny met dan prizon.

Esdras I Remersye Bondye

²⁷ Esdras ti dir, “Loue SENYER, Bondye nou bann zanset! I'n tous leker lerwa pour fer sa gran loner tanp SENYER ki Zerizalenm.

²⁸ I'n montre son gran bonte anver mwan devan lerwa ek son bann konseye e devan tou son bann gran personnaz! Lanmen SENYER mon Bondye ti avek mwan e in donn mwan lafors. Mon'n rasanble bann sef Izrael pour ki zot mont avek mwan Zerizalenm.”