Esdras 6 - Labib An Kreol Seselwa

Repons Lerwa Dariis

¹ Lerwa Dariis ti ordonnen ki resers i ganny fer dan Babilonn, dan arsiv kot tou bann dokiman ti ganny prezerve.

² Me ti dan Ekbatann ki kapital provens Medi, ki zot ti dekouver en roulo kot ti'n ganny ekri:

³ Dan premye lannen son renny, lerwa Siris ti pibliy sa dekre: Tanp Bondye Zerizalenm, i devre ganny rekonstri, lo fondasyon solid, kot sakrifis i ava ganny ofer. I ava 30 met oter e 30 met larzer.

⁴ Zot ava met trwa ranze ros taye, en ranze dibwa nef ant; tou depans ava ganny peye par trezor rwayal.

⁵ Anplis, bann lobze annor e annarzan ki ti dan tanp, ki Naboukodonozor ti pran dan tanp Zerizalenm e ki'n ganny anmenn Babilonn, tousala, ava ganny retournen e remet dan son plas dan tanp Bondye Zerizalenm.

Dariis I Ordonnen ki Travay I Kontinyen

⁶ Alor, Tatenai, gouverner provens ki lo lot kote larivyer Efrat, Setar-Boznai ek ou bann koleg bann gouverner ki dan provens lo lot kote larivyer: Pa bezwen mel zot dan sa zafer.

⁷ Les travay lo tanp Bondye kontinyen; les bann gouverner bann Zwif ek bann ansyen parmi bann Zwif kontiny travay konstriksyon lo tanp Bondye, lo son lanplasman.

⁸ Aprezan, mon ordonnen ki bann ansyen parmi bann Zwif ki pe rekonstri tanp Bondye ava ganny peye, antyerman e san tarde, apartir reveni rwayal e taks ki sorti dan provens lo lot kote larivyer Efrat. Remet egzakteman larzan avek sa bann zonm pour ki sa travay pa ganny enteronpe.

⁹ Fourni zot tou sa ki neseser pour sakrifis konplet anver Bondye dan lesyel: Toro, mouton mal ek bann zenn mouton, dible, diven, delwil; delivre tousala kan bann pret ki Zerizalenm i bezwen pour sak zour e san manke.

¹⁰ Konmsa, zot ofer sakrifis ki donn en loder ki fer plezir Bondye dan lesyel e zot ava priye pour lavi lerwa ek son bann garson.

¹¹ Mon ordonnen ki si okenn dimoun i kas sa lord, i pou ganny bate e pann avek en morso dibwa ki'n ganny tire dan son prop lakaz, e son lakaz pou ganny kraze.

¹² Bondye ki'n etabli son non dan sa landrwa, ava fer tonbe tou lerwa, ek tou pep ki kas sa lord, e detri tanp Bondye ki Zerizalenm! Mwan, Dariis, mon donn sa lord. Pa tarde pour ki i ganny byen egzekite.

Konsekrasyon Tanp

¹³ Alor, Tanai, gouverner provens lo lot kote larivyer avek Setar-Boznai ek son bann asosye ti egzekit deswit lord ki lerwa Dariis ti'n donnen.

¹⁴ Bann ansyen parmi bann Zwif ti konstri avek sikse, dapre parol profet Agze ek Zakari, garson Ido. Zot ti fini zot travay restorasyon dapre lord Bondye Izrael e dapre lord bann lerwa Lapers: Siris, Dariis ek Artakzerzes.

¹⁵ Sa batiman ti ganny konplete trwazyenm zour dan mwan Adar, dan sizyenm lannen renny lerwa Dariis.

¹⁶ Pep Izrael, bann pret, bann levit ek leres ki ti sorti annegzil, ti selebre avek bokou lazwa dedikas tanp Bondye.

¹⁷ Zot ti ofer pour selebrasyon dedikas tanp Bondye, koman sakrifis, 100 toro, 200 mouton mal, 400 zenn mouton, e pour pese Izrael antye, 12 bouk, dapre kantite tribi Izrael.

¹⁸ Zot ti etabli bann pret dapre zot klas ek bann levit dapre zot divizyon pour servis Bondye dan Zerizalenm, parey in ekri dan liv Moiz.

Bann Zwif I Selebre Lafet Pak

¹⁹ Bann ansyen egzile ti selebre Pak katorzyenm zour, premye mwan.

²⁰ Bann pret ek bann levit ti'n pirifye zot tou ansanm; alor zot tou, zot ti pir. Zot ti ofer zenn mouton Pak pour tou bann ansyen egzile e pour zot bann frer pret, e pour zot menm.

²¹ Bann Izraelit ki ti'n retournen sorti annegzil, ti manz repa Pak ansanm avek tou bann ki ti'n ganny separe zot avek bann koutim bann nasyon. Zot ti zwenn ansanm, pour ador SENYER, Bondye Izrael.

²² Answit, pandan set zour, zot ti selebre dan lazwa lafet Dipen san lelven, akoz SENYER ti'n donn zot lazwa e i ti'n tous leker lerwa Lasiri dan zot faver. Sa ti ed zot dan travay tanp Bondye Izrael.