Esdras 5 - Labib An Kreol Seselwa

Konstriksyon Tanp

¹ Apre sa, profet Agze ek profet Zakari, garson Ido, ti koz avek bann Zwif ki ti dan Zida e Zerizalenm lo non Bondye Izrael, zot Bondye.

² Alor, Zorobabel, garson Sealtiel ek Zozye, garson Yosadak, ti konmans rekonstri tanp Bondye dan Zerizalenm. Bann profet Bondye ti la avek zot, pour ed zot.

³ Anmenmtan, Tatenai, gouverner provens lo lot kote larivyer, Setar-Boznai ek zot bann asosye ti vin demann zot, “Lekel ki'n donn zot lord pour rekonstri sa tanp e repar bann miray?”

⁴ Zot ti osi demande, “Lekel sa bann dimoun ki pe travay lo sa batiman?”

⁵ Me Bondye ti pe vey lo bann ansyen Zwif. Zot pa ti fer aret travay, avan ki zot ganny en larepons sorti kot Dariis, kot ki zot ti'n ekri, lo sa size.

⁶ La let ki Tatenai, gouverner provens lo lot kote larivyer ek Setar-Boznai, ek son bann asosye, bann gouverner ki ti dan provens lo lot kote larivyer, ti anvoy lerwa Dariis.

Bann Zwif I Ganny Denonse avek Lerwa Dariis

⁷ Zot ti anvoy li sa rapor: Lerwa Dariis, lape i avek ou!

⁸ Nou pe fer ou konnen ki nou ti al dan provens Zida kot tanp gran Bondye. Sa tanp pe ganny rekonstri avek bann pyer taye, e avek dibwa par anndan miray. Travay pe ganny fer avek swen. I pe progres rapidman dan zot lanmen.

⁹ Nou ti demann bann ansyen, lekel ki'n donn zot permisyon pour rekonstri sa tanp e repar sa bann miray?

¹⁰ Nou ti osi demann zot, zot non pour ki nou kapab ekri non bann sef.

¹¹ La repons ki zot ti donn nou: Nou bann serviter Bondye lesyel ek later e nou pe rekonstri sa tanp ki ti'n konstri plizyer lannen oparavan. En gran lerwa Izrael ki ti konstri e konplet li.

¹² Me akoz nou bann zanset in fer ankoler Bondye dan lesyel, i ti abandonn zot dan lanmen Naboukodonozor, lerwa Babilonn, ki ti detri sa tanp e anmenn son pep annegzil Babilonn.

¹³ Pourtan, dan premye lannen son renny, Siris, lerwa Babilonn, ti ordonnen ki tanp Bondye i ganny rekonstri.

¹⁴ Bann lobze annor e annarzan ki ti dan tanp Bondye ki Naboukodonozor ti pran dan tanp Zerizalenm e ki i ti'n anmennen dan tanp Babilonn. Lerwa Siris ti repran tou sa ki ti dan tanp Babilonn, e konfye avek Sesbasar, ki lerwa ti apwente koman gouverner Zide.

¹⁵ I ti dir li: Pran sa bann lobze e al met zot dan tanp ki Zerizalenm, e ki tanp Bondye ava ganny rekonstri lo son menm lanplasman.

¹⁶ Alor, Sebazar ti vin poz fondasyon tanp Bondye ki Zerizalenm. Depi sa letan ziska ozordi travay in kontinyen, me i pa ankor konplete.

¹⁷ Aprezan, si lerwa i war li bon, fer resers dan bann arsiv rwayal ki dan Babilonn, pour war si okenn lord in ganny donnen par lerwa Siris pour rekonstri tanp Bondye ki Zerizalenm. Apre, lerwa ava fer nou konn son desizyon lo sa size.