Esdras 3 - Labib An Kreol Seselwa

Ladorasyon I Ganny Retabli

¹ Kan setyenm mwan ti arive e tou bann Izraelit ti'n enstal zot dan zot lavil, lepep ti rasanble dan Zerizalenm.

² Zozye, garson Yosadak, ansanm avek son bann konfrer pret ek Zorobabel, garson Sealtiel avek tou son bann fanmir ti konmans rekonstri lotel Bondye Izrael pour zot ofer sakrifis konplet dapre Lalwa Moiz, serviter Bondye.

³ Menm si zot ti per popilasyon lokal, zot ti retabli lotel dan son lanplasman, e zot ti ofer SENYER sakrifis konplet bomaten e aswar.

⁴ Zot ti selebre lafet bann Latant dapre Lalwa Moiz e ofer sakrifis pour sak zour parey lalwa in ordonnen.

⁵ Apre, zot ti ofer sakrifis tou le zour ek sakrifis pour nouvellin, pour bann lafet konsakre pour SENYER ek bann lofrann volonter ki dimoun ti ofer SENYER.

⁶ Apartir premye zour, setyenm mwan, zot ti konmans ofer sakrifis konplet. Me fondasyon tanp SENYER pa ti ankor ganny poze.

⁷ Zot ti donn larzan bann mason ek bann sarpantye. Zot ti donn manze, bwar, ek delwil bann Sidonit ek bann Tiryen, pour fer transport pye sed par bato sorti Liban pour anmenn Zafa, dapre lotorizasyon Siris, lerwa Lapers.

⁸ Pandan dezyenm lannen, apre ki zot ti'n retourn Zerizalenm kot tanp Bondye, dan dezyenm mwan, Zorobabel, garson Sealtiel, Zozye, garson Yosadak, avek leres zot bann frer bann pret ek levit ek tou bann ki ti'n retourn Zerizalenm sorti annegzil, zot ti konmans travay. Zot ti donn sa responsabilite bann levit aze 20 an, an montan pour sirvey bann travay lo tanp SENYER.

⁹ Zozye, avek son bann garson ek son bann frer, Kadmyel, avek son bann garson ki ti Zideen, bann garson Henadad avek zot garson e zot frer bann levit, zot tou, zot ti ganny responsabilite pour sirvey bann ki pe travay lo tanp Bondye.

¹⁰ Kan bann travayer ti poz fondasyon tanp SENYER, bann pret dan zot rob seremoni ti avans devan avek zot tronpet, e bann levit, bann garson Asaf, avek zot senbal, ti rann glwar SENYER dapre bann direktiv donnen par David, lerwa Izrael.

¹¹ Zot ti loue SENYER; sakenn son tour, zot ti sant sa refren: SENYER i bon, son lanmour pour Izrael i dire pour touzour! Lepep antye osi ti loue SENYER par bann gran aklamasyon, akoz zot ti pe poz fondasyon tanp SENYER.

¹² Bokou parmi bann pret ek levit, avek bann pli vye sef lafanmir ki ti'n war sa premye tanp, ti plere e kriye kan zot ti war pe poz fondasyon tanp. Me bokou ti pler avek kontantman.

¹³ Lepep an zeneral pa ti kapab distenge ant aklamasyon en bann, avek bann pler lezot. Annefe, sa gran tapaz lepep, ti kapab ganny tande depi tre lwen.