Eklezyas 9 - Labib An Kreol Seselwa

Menm Sor pour Tou Imen

¹ Mon reflesi lo tousala; la sa ki mon'n remarke: Bann zis, bann saz ek zot travay, tou i dan lanmen Bondye, menm lanmour, ensi ki laenn; bann et imen pa ni konnen ki pou arive.

² Pour tou dimoun i parey; menm sor i ganny rezerve pour bann zis ek bann malfeter; pour bann ki pir ek bann ki enpir, sa enn ki fer sakrifis ensi ki sa enn ki pa fer. Napa diferans ant sa ki bon ek sa ki move. Sa ki pret serman devan Bondye i parey sa ki per pou fer li.

³ La kot i mal dan tou sa ki pase anba soley: En menm sor pour tou dimoun san okenn eksepsyon. Leker imen i plen avek mesanste, lafoli i ranpli zot leker depi zot lazenes ziska zot lanmor.

⁴ Pour tou sa ki vivan, i annan lespwar; en dernyen lisyen vivan i vo plis ki en lyon mor.

⁵ Annefe, sa ki vivan, zot konnen ki zot pou mor; me bann mor pa konn nanryen; pour zot, napa okenn rekonpans, akoz zot non i ganny oubliye.

⁶ Zot lanmour, zot laenn zot zalouzi, tou in disparet ansanm avek zot; zot pou nepli annan okenn par dan tou sa ki pe pase anba soley.

⁷ Ale, manz ou dipen avek lazwa e bwar ou diven avek en leker kontan; akoz Bondye in deza aprouv ou travay.

⁸ Gard ou lenz toultan byen elegan e pa manke touzour met delwil lo ou latet.

⁹ Profit byen lavi avek fanm ki ou kontan, sa enn ki Bondye in donn ou pour viv avek pandan ou bann zour initil. Sa i ou par dan lavi e rezilta travay ki ou fer anba soley.

¹⁰ Tou sa ki ou lanmen i kapab fer, fer li avek ou prop lafors akoz pou napa ni aktivite, ni rezon, ni konnesans, ni lasazes dan lemonn lanmor, kot ou pe ale.

¹¹ Mon'n osi dekouver anba soley, ki dan en paryaz pa sa ki pli rapid ki gannyen; laviktwar pa vin pour sa enn ki pli vayan; dipen pa vin pour sa ki pli saz e larises pour sa ki pli entelizan, ni faver pour sa ki pli savan, akoz tou i depann lo letan ek sirkonstans.

¹² Annefe, zonm pa konn zour son maler plis ki en pwason dan lasenn oubyen en zwazo dan latrap. Parey zot, maler i tonm lo imen san ki i pe atann.

Refleksyon lo Lasazes ek Lafoli

¹³ Mon'n osi trouve anba soley keksoz konsernan lasazes ki paret enportan.

¹⁴ I ti annan en pti lavil ki annan en pti git zabitan. En gran lerwa ti atak sa lavil e konstri bann gran baraz otour li.

¹⁵ Ti annan en zonm pov me saz ki ti sov sa lavil par son lasazes; personn pa ti rapel sa zonm pov.

¹⁶ Alor, mon dir dan mwan menm, lasazes i preferab ki lafors. Pourtan, lasazes en pov i ganny meprize e son parol pa ganny ekoute.

¹⁷ Bann parol saz ki ganny ekoute dan kalm, i vo plis ki lord sef en pei ki ganny kriye devan bann ensanse.

¹⁸ Plito lasazes ki bann masin lager, me en sel maladrwat i deranz tou dibyen ki i'n fer.