Eklezyas 8 - Labib An Kreol Seselwa

¹ Lekel sa zonm saz ki konn lenterpretasyon sa bann keksoz? Lasazes en zonm i met en sourir lo son vizaz e fer disparet pli lo son figir.

Obei Lerwa

² Mon dir: Obei bann lord lerwa, akoz serman ki ou'n fer devan Bondye.

³ Pa dekoste ou avek li tro vit; pa persiste dan en move zafer. Bondye i fer sa ki fer li plezir.

⁴ Parol lerwa i lotorite; lekel ki pou dir li: Ki ou pe fer?

⁵ Sa ki obei lord, pa pou ganny okenn problenm; me en zonm saz i konnen kan e ki mannyer fer keksoz.

⁶ Sak keksoz i annan son letan e en bon fason fer, me problenm zonm i anmenn maler lo li.

⁷ Annefe, i pa konn lavenir; lekel ki kapab dir kan en keksoz pou arive?

⁸ Personn napa kapab kontrol lo lavi; personn pa kapab retard zour son lanmor; dan lager personn pa kapab sove; mesanste pa les personn ki move, sape.

Refleksyon lo Lavi Imen

⁹ Mon'n obzerve tousala e mon'n reflesi lo tou sa ki pase anba soley. Zonm i domin lo son kanmarad pour fer son maler.

¹⁰ Mon'n war lanterman bann malfeter, bann ki monte e desann dan tanp. Zot oubliye ki mannyer zot ti azir dan lavil. Sa osi i en vanite.

¹¹ Nou tarde pour kondann en move aksyon, akoz leker imen i ranpli avek move lentansyon.

¹² En malfeter i kapab mal azir plis ki 100 fwa e viv lontan. Me mon konnen ki i annan boner pour sa ki annan respe pour Bondye.

¹³ Me napa boner pour bann malfeter; son lavi pou pas vit parey lonbraz, akoz zot napa respe pour Bondye.

¹⁴ Lo later, i annan en lot keksoz ki pa fer sans: En zonm zis i pas pour en malfeter, e en malfeter i pas pour en zonm zis. Mon dir ki sa i vanite.

¹⁵ Alor, mon ti dir: Anmize, akoz napa nanryen ki bon pour zonm anba soley; zis manze, bwar ek diverti; se sa ki pou avek li toultan dan son travay, tou le zour son lavi ki Bondye in donn li anba soley

¹⁶ Ler mon ti deside pour konn lasazes, e war tou sa ki pase lo later, akoz zonm i fatig son lekor, i pa dormi ni lizour, ni aswar,

¹⁷ mon'n war tou travay Bondye: Zonm pa war travay ki ganny fer anba soley. Sa ki zonm i donn bokou lapenn pour rode, i pa trouve; menm si zonm saz i pretann konn tou keksoz, i pa pou kapab konpran.