Eklezyas 7 - Labib An Kreol Seselwa

Refleksyon lo Lavi

¹ En bon repitasyon i pli bon ki parfen renonmen e zour lanmor i preferab ki zour nesans.

² Plito al dan en lakaz dey, olye al kot i annan festen. Annefe, tou dimoun i pas par lanmor; fodre ki tou vivan i rapel sa.

³ Sagrinasyon i preferab ki pe riye, akoz anba en vizaz tris i kapab annan en leker ere.

⁴ Bann zonm saz i mazin soufrans lanmor. Bann sot i pas letan dan festen.

⁵ Plito ekout repros en saz ki ekout sanson bann sot.

⁶ Riye en sot i parey dibwa pikan ki pe krake dan dife anba marmit. Sa osi i vanite.

⁷ Pouvwar i rann en saz fou; kado i fer perdi bon rezonnman.

⁸ Plito lafen en keksoz ki son konmansman. Plito en lespri kalm ki en lespri lorgey.

⁹ Pa pran lakoler tro vit akoz bann sot ki gard rankin.

¹⁰ Pa dir: Lontan ti pli bon ki konmela! Sa pa sorti dan labous en saz.

¹¹ Lasazes i osi bon ki en leritaz, i menm en lavantaz pour bann ki'n war soley.

¹² Lavantaz ki lasazes i anmennen i parey lavantaz larzan; konnesans i en lavantaz; i prezerv lavi bann saz.

¹³ Get travay Bondye; lekel ki kapab dres sa ki i'n fer kourbe?

¹⁴ Dan zour prosperite, profit ou boner, e dan letan difisil, reflesi: Bondye in fer enn egzakteman parey lot de sort ki zonm pa dekouver son lavenir.

¹⁵ Mon'n war bokou keksoz dan mon kourt lavi: En zonm ki drwat, i disparet akoz son bon konportman, tandis ki en malfeter i kontinyen viv dan son mesanste.

¹⁶ Pa paret tro zis e pa montre ou tro saz. Akoz ou bezwen detri ou prop lekor?

¹⁷ Pa bezwen montre tro mesanste e fer parey bann sot; akfer ou bezwen mor avan ou ler?

¹⁸ I bon ki ou gard sa premye konsey san oubliy lot; sa enn ki annan respe pour Bondye i trouv en semen sorti dan tou sityasyon.

¹⁹ Lasazes i rann en saz pli for ki dis gouverner dan en lavil.

²⁰ Lo later, napa en sel zis, ki fer zis sa ki byen san komet en pese.

²¹ Pa ekout tou sa ki dimoun i dir akoz ou riske antann ou travayer pe malparl ou.

²² Akoz ou konnen ki bokou fwa ou menm ou'n malparl lezot.

²³ Mon'n teste tou sa avek lasazes; mon ti dir: Mon pou fer tou keksoz avek lasazes. Me lasazes i reste lwen avek mwan.

²⁴ Lekel ki kapab dekouver sa ki egziste? I tre lwen e tro profon?

²⁵ Alor, mon ti etidye avek bokou atansyon pour rode kisisa lasazes e konpran pour ki rezon ki keksoz i arive. Mon'n aprann osi ki fer mesanste i en keksoz fou e bet.

²⁶ Alor, mon'n dekouver sa ki pli anmer ki lanmor: En fanm ki tant zonm, son leker i parey en pyez e son lanmen i parey lakord. Sa zonm ki fer plezir Bondye pou sape, me en peser pou pri dan son lasenn.

²⁷ Eklezyas i dir: Mon ti obzerv tou keksoz, enn par enn pour trouv larezon en keksoz i arive. La sa ki mon'n dekouver.

²⁸ Mon'n rode ankor, me mon pa'n trouve. Mon'n trouv en zonm parmi 1,000; me mon pa ankor dekouver en sel fanm parmi zot tou.

²⁹ Selman, la sa ki mon'n dekouver: Se ki Bondye in fer et imen drwat, me se zot ki'n rod konplikasyon.