Eklezyas 5 - Labib An Kreol Seselwa

Pa Fer Promes Vid

¹ Fer atansyon ler ou al kot tanp Bondye; al pour ekoute plito ki pour ofer sakrifis parey bann fou, akoz zot pa ni konnen si zot pe mal azir.

² Pa bezwen prese pour koze, ni pour dir nenport parol devan Bondye. Bondye i dan lesyel e ou, ou anba lo later. Alor, pa koz bokou.

³ Annefe, parey bann rev, ki rezilta tro bokou preokipasyon, sa ki koz bokou i koz betiz.

⁴ Ler ou fer en ve avek Bondye, pa tarde pour akonpli li, akoz Bondye pa pran plezir dan bann sotiz; akonpli ve ki ou'n fer.

⁵ I preferab pour pa fer okenn ve, ki fer en ve san gard ou parol.

⁶ Evite pronons parol ki pou rann ou koupab; pa bezwen al dir avek mesaze Bondye ki ou'n tronpe. Akoz fer Bondye ankoler avek ou e detri travay ki ou'n fer?

⁷ Bokou rev i zis vanite parey bokou parol. Alor, annan respe pour Bondye.

Lavi pa Fer Sans

⁸ Pa etonnen si ou war bann pov pe ganny kraze par labi e kan dimoun dan pei i perdi zot drwa e pa ganny lazistis. Annefe, par lao en fonksyonner enportan, i annan en sef pli enportan ki protez li; par lao tou le de, i annan en lot sef pli enportan ankor.

⁹ Later i anmenn benefis pour tou dimoun; menm lerwa, i depann lo lakanpanny.

¹⁰ Larzan pa zanmen ase pour sa enn ki kontan larzan; menm sa enn ki kontan larises pa zanmen satisfe avek sa ki i annan. Sa osi i zis vanite.

¹¹ Kan bann byen en zonm i ogmante, bann ki profit lo la i osi ogmante; ki benefis bann propriyeter i gannyen, sinon zis pour admire avek zot lizye?

¹² Sonmey en labourer i profon, menm si i ganny zis en pti pe manze oubyen bokou pour manze; me en zonm ris pa dormi akoz i posed tro bokou.

¹³ Mon'n war en gran maler anba soley: Larises ki en zonm i akimile; sa i pour son maler.

¹⁴ I perdi sa larises dan en move zafer; si i ganny en zanfan, son zanfan nepli annan nanryen.

¹⁵ Parey i'n sorti dan vant son manman touni, i pou kit later touni; i pa pou anmenn nanryen avek li koman fri son travay.

¹⁶ Sa i osi en gran maler; i pou retourn egzakteman parey i ti vini. Ki profi in gannyen? I'n travay dan vid.

¹⁷ I'n pas tou son letan dan fernwanr, dan bokou traka, bokou soufrans ek fristrasyon.

¹⁸ La sa ki mon'n war: I meyer pour en dimoun manze, bwar, profit plezir dan tou sa ki i fer anba soley, pandan tou son lavi ki Bondye in donn li; sa i son sor.

¹⁹ En et imen ki Bondye in donn larises ek posesyon, e osi posibilite pour zouir son benefis, devre profite koman par e rezilta son travay. Sa i en kado sorti kot Bondye.

²⁰ Apre tou, i pa pou rapel son lavi kourt, akoz Bondye in ranpli son leker avek lazwa.