Eklezyas 2 - Labib An Kreol Seselwa

¹ Mon ti dir dan mwan menm: Mon pou teste ou avek bann plezir e fer ou konnen kisisa boner. La osi mon ti dekouver ki tousala ti zis vanite.

² Mon ti war ki riye i en keksoz fou e bet; plezir pa anmenn okenn benefis.

³ Mon ti deside rod plezir dan labwason; mon ti touzour kontrol mwan par lasazes. Mon ti oule war pli bon fason pour dimoun pas son lavi lo later.

⁴ Mon ti realiz bann gran proze. Mon ti fer bann gran lakaz e kiltiv gran plantasyon rezen.

⁵ Mon ti fer zarden ek bann plantasyon, plant bann diferan kalite fri.

⁶ Mon ti fer bann rezervwar delo pour aroz bann zenn pye dibwa.

⁷ Mon ti aste bokou lesklav, zonm ek fanm; zot zanfan in ne lanmenm; mon ti annan bokou serviter. Mon ti posed bokou zannimo, bef ek mouton, plis ki tou dimoun ki ti reste Zerizalenm avan mwan.

⁸ Mon ti akimil en gran kantite larzan ek lor, trezor ki'n sorti partou dan mon rwayonm. Mon ti annan zonm ek fanm ki ti sante pour mon plezir, e mon ti annan bokou fanm, neseser pour donn plezir en zonm.

⁹ Mon ti'n vin pli gran ki tou sa ki'n deza viv dan Zerizalenm avan mwan; mon lasazes in touzour ed mwan.

¹⁰ Tou sa ki mon lizye ti anvi mon ti satisfer li; mon pa ti zanmen priv mon lekor. Mon fyer pour mon bann lakonplisman; tousala i mon rekonpans pour tou mon travay.

¹¹ Alor, mon ti konsider tou sa ki mon'n akonpli, travay dir ki mon'n realize avek bokou lapenn: Tousala i vanite, konmsi mon pe tay deryer divan. I pa vreman anmenn okenn lavantaz anba soley.

¹² Alor, mon ti rekonmans reflesir lo lasazes, lafoli ek sotiz. Mon ti demande: Ki sa enn ki vin lerwa apre mwan pou fer? I pou fer zis sa ki sa bann avan in fer?

¹³ Mon ti war ki lavantaz lasazes i annan lo lafoli; i parey lalimyer lo fernwanr.

¹⁴ En dimoun saz i konnen kote i pe ale, me en zonm bet i tatonnen dan fernwanr. Pourtan, menm sor pe esper tou le de.

¹⁵ Mon dir dan mwan menm: Sa ki ariv avek en zonm bet, pou osi ariv avek mwan. Alor, ki profi mon tire avek mon lasazes? Mon dir tousala i osi vanite.

¹⁶ Tou sa ki arive avek en saz oubyen avek en sot pou ganny oubliye. En saz i mor, zis parey en dimoun sot.

¹⁷ Alor, mon deteste lavi; pour mwan, tou sa ki ganny realize anba soley i move, tousala i vanite; i zis konmsi ou pe tay deryer divan.

¹⁸ Mon deteste tou travay ki mon'n fer anba soley; mon bezwen les tou pour sa enn ki vin apre mwan.

¹⁹ Ki swa en zonm saz oubyen en zonm fou, i pou annan pouvwar lo tou travay ki mon'n fer avek lasazes; tousala i zis vanite.

²⁰ Ler mon reflesir, mon regrete pour lapenn travay ki mon'n donnen anba soley.

²¹ En dimoun in travay avek lasazes, konnesans ek sikse; i bezwen kit sa ki i'n realize pour en lot ki pa'n fer nanryen. Sa osi i vanite.

²² Ki i reste pour sa zonm apre tou son aktivite ek tou son zefor anba soley?

²³ Tou sa ki i'n fer dan lavi i anmenn zis douler ek lapenn; menm aswar i pa kapab ganny en repo. Sa ankor i zis vanite.

²⁴ Sel bon keksoz pour en et imen fer, se manze, bwar e war rezilta son travay; mwan mon krwar, sa i sorti kot Bondye.

²⁵ Lekel ki kapab anmize e profit lavi san Bondye?

²⁶ I donn lasazes, konnesans ek lazwa sa enn ki fer li plezir. Me sa enn ki mal azir, i fer li rasanble bann byen pour sa enn ki fer plezir Bondye. Sa i zis vanite, konmsi ou pe tay deryer divan.