Eklezyas 12 - Labib An Kreol Seselwa

¹ Pandan ki ou ankor zenn, pa oubliy ou Kreater, rapel li byen avan ki bann zour maler i tonm lo ou e ou dir: Mon nepli annan plezir dan nanryen.

² Avan sa bann zour kan laklerte soley i vin sonm, lalin ek bann zetwal i tennyen e ki bann nyaz i retournen apre lapli;

³ kan sa zour i arive, bann gardyen lakaz pou tranble avek lafreyer; bann zonm vayan ava pe kourbe; bann fanm ava aret pile, akoz napa bokou zot; bann fanm ki get par lafnet nepli war kler.

⁴ Laport ki vir lo lari i reste fermen; ou nepli antann tapaz pile. Zwazo i nepli sante, bann sanson in arete.

⁵ En pti monte i fer per, ou per marse lo semen; seve in vin blan parey en pye dibwa an fler; ou pou bezwen trennen parey en sotrel ki'n tonbe; tou gou lavi in disparet. Tou et imen i al ver son demer final. Deza laprosesyon lanterman pe defile lo semen.

⁶ Alor, reflesi, avan ki sa kordon lavi i detase, avan sa vaz annor i kase e sa potao i brize e lakord i tonm dan fon pwi;

⁷ avan ki lapousyer i retourn dan later kot in ganny tire e souf lavi i retourn kot Bondye ki ti donn li.

⁸ Eklezyas i dir: Tousala i initil, i pa fer sans.

Konklizyon

⁹ Fodre osi azoute: En saz, anplis son lasazes, Eklezyas in osi ansenny konnesans. In peze, egzamin a fon e met annord bokou proverb.

¹⁰ Sa zonm saz in fer gro zefor pour dekrir onnetman realite lavi e trouv bann zoli parol.

¹¹ Parol bann zonm saz i parey en baton byen pwent e sa bann ki'n ekri li i parey en klou byen anfonse. Tousala, Bondye, sel berze ki'n enspir zot.

¹² Mon garson! Pa azout nanryen, pran sa konsey: Ekri bokou liv i en travay san finisyon, e bokou letid i fatigan pour lekor.

¹³ Ekout konklizyon tousala: Annan respe pour Bondye e obei son komannman. La sa ki tou et imen i devre fer.

¹⁴ Akoz Bondye pou ziz tou keksoz ki nou'n fer, tou sa ki dan kasyet, byen ou mal.