Eklezyas 11 - Labib An Kreol Seselwa

Pran Risk avek Lasazes

¹ Zet ou dipen lo delo avek letan, ou ava ganny bon rezilta.

² Donn en par plizyer dimoun, akoz ou pa konnen ki maler i kapab arive lo later.

³ Ler nyaz i plen avek delo, lapli i tonm lo later. Dan nenport kote ki en pye dibwa i tonbe, i pou reste kot in tonbe.

⁴ Sa enn ki per divan, pa pou zanmen plante; sa enn ki per lapli, pa pou rekolte.

⁵ Ou pa konnen ki mannyer souf lavi ek lezo i formen dan vant en fanm ansent. Pareyman, ou pa kapab konnen ki mannyer Bondye i fer tou keksoz.

⁶ Alor, byen granmaten senm ou legren e menm aswar, pa arete. Ou pa konnen lekel ant zot ki pou reisi, oubyen lekel ki bon.

⁷ Lalimyer granmaten i bon; i bon pour lizye, pour war soley.

⁸ Si en dimoun i viv lontan, i devre zouir sak lannen ki i viv. Rapel byen ki pou annan bokou zour sonm. Tousala, i zis vanite.

Konsey pour bann Zenn

⁹ Ou ki ankor zenn, profit byen bann lannen ou lazenes. Viv ere pandan ki ou ankor zenn. Fer tou sa ki ou kontan, e tou sa ki donn ou plezir. Me ou bezwen konnen ki Bondye pou ziz tou ou bann aksyon.

¹⁰ Alor, met dekote tou traka; gard maladi lwen avek ou. Lazenes i pas vit. Tousala, i zis vanite.