Eklezyas 10 - Labib An Kreol Seselwa

¹ Detrwa mous mor i enfekte e detri en parfen; en pe sotiz i gat lasazes ek loner.

² En zonm saz i fer sa ki byen me en sot i fer zis gasi.

³ Ler en fou i marse lo semen, tou dimoun i war ki i fou akoz sa ki i fer napa sans.

⁴ Si ou sef i ankoler kont ou, pa bezwen ki ou kit ou travay! En lespri kalm i evit bann fot grav!

⁵ En dirizan i kapab tronpe, mon'n war bokou lenzistis lo later.

⁶ Bann fou i souvan ganny plase dan gran fonksyon, tandis ki bann zonm kapab i zemir anba.

⁷ Mon'n deza war bann lesklav pe mont seval e bann sef pe mars apye parey lesklav.

⁸ Sa enn ki fouy en trou i riske tonm ladan e sa enn ki kas en miray i riske ganny morde par en serpan.

⁹ Sa enn ki pe roul ros i kapab ganny blese e sa enn ki fann dibwa i kapab ganny dimal.

¹⁰ Kan en lars pa koupe, si ou pa fit li, ou bezwen servi doub lafors; lasazes i donn lavantaz pour sikse.

¹¹ Si en donter serpan i fini par ganny morde, ki lavantaz i annan koman en donter.

¹² Kan en saz i koze, son parol i ganny aprouve. Me parol en sot i kondann li.

¹³ I konmans par bann sotiz e fini par bann parol fou ranpli avek mesanste.

¹⁴ En fou i koz bokou, san arete. Pourtan, bann et imen pa konn nanryen lo lavenir. Lekel ki pou dir li sa ki pou arive dan lavenir.

¹⁵ En sot i fatig bokou pour nanryen ditou, me i pa ni menm konn son semen pour al dan lavil.

¹⁶ I en maler pour en pei kan son lerwa i tro zenn e son bann sef i konmans manz depi bomaten.

¹⁷ Me en pei ki son lerwa i sorti dan en fanmir nob e son bann sef i manz ler i neseser. I fer li pour reganny lafors e non pa pour soule.

¹⁸ Twa lakaz i tonm lo sa ki tro pares pour repare. Lapli i tonm dan lakaz sa ki neglizan.

¹⁹ Bann ris i donn festen pour diverti; diven i rann lavi gou; larzan i permet fer tou.

²⁰ Pa kritik lerwa menm dan ou leker; pa dir nanryen mal lo bann ris, menm dan ou lasanm. En zwazo i kapab anmenn ou parol e raport sa ki ou'n dir.