Eklezyas 1 - Labib An Kreol Seselwa

Lavi pa Fer Sans

¹ Parol en saz, garson David, ki ti lerwa dan Zerizalenm.

² Sa zonm saz i dir: Tou i vanite. Tou keksoz i anven e initil!

³ Ki profi en dimoun i gannyen pour tou travay ki i fer lo later?

⁴ En zenerasyon i pase, en lot zenerasyon i vini, me later i reste touzour lanmenm.

⁵ Soley i leve; soley i kouse; vit i retourn la kot i ti leve.

⁶ Divan i soufle dan direksyon Sid, apre i tourn dan direksyon Nor. I vire; i tournen e retournen; apre i rekonmans son letour.

⁷ Tou larivyer i koul dan lanmer me lanmer pa zanmen ranpli. Bann larivyer i touzour kontinyen koule ver menm landrwa.

⁸ Tousala i fatigan; i repete san ki ou kapab dir: Ase. Lizye pa fatige war; zorey pas fatige tande.

⁹ Tou sa ki'n deza arive pou ariv ankor; tou sa ki'n deza ganny fer, pou ganny fer ankor; napa nanryen nouvo anba soley.

¹⁰ Dimoun i kapab dir: Gete! Sa i nouvo! Pourtan, tousala i egziste byen lontan avan.

¹¹ Nou fasilman oubliy tou sa ki'n arive dan letan pase. Zenerasyon ki vin apre nou, zot osi, zot pou ganny oubliye par bann ki vin apre.

Leksperyans en Zonm Saz

¹² Mwan, en saz, mon ti lerwa lo pep Izrael, dan Zerizalenm.

¹³ Mon ti deside etidye avek swen, tou bann keksoz ki ganny fer anba soley. Sa i en travay dir ki Bondye i'n donn nou, imen, pour aplik li dan nou lavi.

¹⁴ Mon'n war tou sa ki ganny fer anba soley; tousala i zis vanite, initil, konmsi ou pe tay deryer divan.

¹⁵ Sa ki tord pa kapab ganny drese; sa ki manke, pa kapab ganny konte.

¹⁶ Mon dir dan mwan menm: Mwan, mon'n akimil plis lasazes ki tou savan avan mwan, dan Zerizalenm. Mon annan bokou leksperyans e mon annan gran konnesans.

¹⁷ Mon ti deside etidye seryezman pour konpran sa ki saz e konn sa ki fou e bet. Mon'n dekouver ki sa osi, i zis konmsi ou pe tay deryer divan.

¹⁸ Gran lasazes i anmenn bokou traka; pli ou konnesans i gran, pli ou annan tourman.