Egzod 6 - Labib An Kreol Seselwa

Bondye Pou Delivre Izrael

¹ SENYER ti dir Moiz, “Aprezan, ou ava war ki mon pou fer avek Faraon: Par pwisans mon lanmen ki i pou les ale mon pep, par pwisans mon lanmen ki i pou sas zot dan son pei.”

Bondye I Apel Moiz

² Bondye ti dir Moiz, “Mwan menm SENYER.

³ Mon ti aparet avek Abrahanm, Izaak ek Zakob koman Bondye Toupwisan, me mon pa ti fer zot konn mwan par mon non: SENYER.

⁴ Mon ti osi etabli mon lalyans avek zot, pour donn zot pei Kanaan, sa pei kot zot ti viv koman etranze.

⁵ Mon'n antann konplent pep Izrael ki anba lesklavaz bann Ezipsyen e mon'n rapel mon lalyans.

⁶ Alor, dir bann Izraelit: Mwan menm SENYER, mon pou tir zot anba latas bann Ezipsyen e mon pou delivre zot anba lesklavaz ki zot pe sibir. Par mon pwisans, par mon bann gran zizman, mon pou liber zot.

⁷ Mon pou fer zot vin mon pep, e mon pou vin zot Bondye, pour ki zot konnen ki se mwan menm SENYER, zot Bondye ki'n fer zot sorti anba latas bann Ezipsyen.

⁸ Mon pou fer zot antre dan sa pei ki mon ti fer serman pour donn Abrahanm, Izaak ek Zakob: Mwan SENYER, mon pou donn zot sa later pour zot posesyon.”

⁹ Moiz ti dir tou sa bann parol avek pep Izrael. Me zot pa ti ekout li akoz zot ti'n dekouraze anba sa lesklavaz kriyel ki zot ti ladan.

¹⁰ SENYER ti dir Moiz,

¹¹ “Ale! Koz avek Faraon, lerwa Lezip, pour ki i les pep Izrael sorti dan son pei.”

¹² Devan SENYER, Moiz ti dir “Si pep Izrael pa'n ekout mwan, ki mannyer Faraon pou ekout mwan, mwan ki napa laparol fasil?”

¹³ SENYER ti koz avek Moiz ek Aaron. I ti donn zot bann lord konsernan bann Izraelit ek Faraon, lerwa Lezip, pour li fer bann Izraelit sorti Lezip.

Zanset Moiz ek Aaron

¹⁴ La lalis bann sef fanmir bann Izraelit: Bann garson Riben, premye ne dan Izrael: Henok, Palou, Hesronn, ek Karmi; zot ti klan bann Ribenit.

¹⁵ Bann garson Simeon: Yemonel, Yamin, Ohad, Yakin e Soar, ek Saoul, garson en fanm Kananeen. Zot ti klan bann Simonit.

¹⁶ La non bann garson Levi dapre zot desandans: Gersonn, Keat ek Merari. Levi ti viv ziska 137 an.

¹⁷ Bann garson Gersonn: Libni ek Simei, dapre zot klan.

¹⁸ Bann garson Keat: Anmranm, Yitsehar, Hebron e Ouzyel. Keat ti viv ziska 133 an.

¹⁹ Bann garson Merari: Mali ek Mousi. Sa i lalis bann klan bann levit ek zot desandans.

²⁰ Anmranm ti marye avek Yokebed son tantin, ki ti donn li de garson: Aaron ek Moiz. Anmranm ti viv ziska 137 an.

²¹ Bann garson Isar: Kore, Nefeg ek Zikri.

²² Bann garson Ouzyel: Mikael, Elsafann ek Sitri.

²³ Aaron ti marye avek Eliseba, fiy Aminadab e ser Nasonn. I ti donn li kat garson: Nadab, Abihou, Eleazar ek Itamar.

²⁴ Bann garson Kore: Asir, Elkana e Abyasaf. Sa ti bann klan bann Koreit.

²⁵ Eleazar, garson Aaron ti marye avek enn bann fiy Poutiel ki ti donn li en garson: Fineas. Sa ti bann sef fanmir bann levit avek zot bann klan.

²⁶ Sanmenm sa Moiz ek Aaron avek ki SENYER ti dir: Fer sorti bann Izra-elit dan Lezip koman en sel larme.

²⁷ Se zot menm, Moiz ek Aaron, ki ti al koz avek Faraon, lerwa Lezip, pour liber bann Izraelit.

Bondye I Renouvle Son Promes avek Moiz

²⁸ Kan SENYER ti koz avek Moiz dan pei Lezip,

²⁹ i ti dir li, “Mwan menm SENYER. Al dir avek Faraon, lerwa Lezip tou sa ki mon dir ou.”

³⁰ Me Moiz ti dir devan SENYER, “Mon napa parol fasil. Ki mannyer Faraon pou ekout mwan?”