Egzod 5 - Labib An Kreol Seselwa

Moiz ek Aaron Devan Faraon

¹ Apre, Moiz ek Aaron ti al kot Faraon. Zot ti dir li, “La sa ki SENYER, Bondye Izrael i deklare: Les mon pep ale pour li selebre en lafet an mon loner dan dezer.”

² Faraon ti dir, “Lekel li sa SENYER pour ki mon devre ekoute e les pep Izrael ale? Mon pa konn sa SENYER. Mon pa pou les pep Izrael ale.”

³ Zot ti dir, “Bondye bann Ebre in aparet avek nou. Les nou pep ale pour en vwayaz trwa zour dan dezer pour al ofer sakrifis SENYER nou Bondye; sankwa i pou detri nou par maladi oubyen par lager.”

⁴ Lerwa Lezip ti dir zot, “Moiz ek Aaron! Akoz zot oule fer dimoun kit zot travay? Ale! Retourn dan zot latas.”

⁵ Faraon ti dir: “Aprezan ki sa pep in vin pli nonbre ki zabitan sa pei, ki zot oule anpes zot travay!”

Faraon I Ogmant Travay bann Izraelit

⁶ Sa menm zour, Faraon ti donn sa lord avek bann lenspekter lepep,

⁷ “Pa bezwen donn lapay bann Izraelit pour fer brik parey avan. Les zot al anmas zot lapay zot menm.

⁸ Selman, zot pou bezwen fer menm kantite brik parey avan; ou pa pou diminyen. Zot pares; pour sa rezon ki zot kriye: Annou al ofer bann sakrifis an loner nou Bondye.

⁹ Fer zot travay pli dir ankor, pour zot napa letan pour port latansyon lo sa bann mansonz.”

¹⁰ Bann lenspekter ti al dir avek lepep, “Faraon i dir: Mon pa pe donn zot lapay ankor.

¹¹ Al rod zot prop lapay kot zot ava kapab trouve; me zot latas pa pou diminyen.”

¹² Alor, lepep ti al partou dan Lezip pour ranmas lapay e koup an morso.

¹³ Bann lenspekter ti fors zot an dizan: Zot bezwen fer zot latas tou le zour parey kan ti annan lapay.

¹⁴ Bann kontroler Izraelit ti menm ganny bate. Zot ti'n ganny apwente par bann lenspekter Faraon. Zot ti ganny demande: Akoz zot pa'n fini zot latas brik yer e ankor ozordi, parey avan?

¹⁵ Bann kontroler ti al konplent devan Faraon. Zot ti dir li, “Akoz ou tret nou konmsa, nou, ou bann serviter?

¹⁶ Zot pa donn nou lapay e zot dir: Fer brik! Nou ganny bate, me i pa nou lafot; i lafot ou pep.”

¹⁷ Faraon ti reponn, “Zot pares. Pour sa rezon ki zot dir: Annou al ofer bann sakrifis pour SENYER.

¹⁸ Aprezan, al fer zot latas! Zot pa pou ganny okenn lapay, me zot bezwen fer menm kantite brik.”

¹⁹ Bann kontroler Izraelit ti remarke ki zot ti dan en sityasyon difisil ler zot ti ganny dir ki zot bezwen prodwir menm kantite brik par zour parey avan.

²⁰ Ler zot ti sorti kot Faraon, zot ti al zwenn Moiz ek Aaron ki ti pe esper zot.

²¹ Zot ti dir Moiz ek Aaron, “SENYER i war sa ki zot in fer, e i ava ziz zot. Zot in fer Faraon avek son bann serviter deteste nou. Ou'n met en lepe dan zot lanmen pour touy nou.”

Moiz I Konplent avek Senyer

²² Moiz ti retourn kot SENYER. I ti dir li, “SENYER, akoz ou pe fer ou pep pas tou sa martir? Akoz ou'n anvoy mwan?

²³ Depi ki mon'n vin kot Faraon pour koz lo ou non, in fer plis ditor sa pep e ou pa ankor delivre li.”