Egzod 38 - Labib An Kreol Seselwa

Fabrikasyon Lotel pour Sakrifis Konplet

¹ Besalel ti fer lotel pour sakrifis konplet avek dibwa akasya; i ti kare e mezir de met edmi lo sak kote e en met edmi oter.

² I ti fer bann kwen en sel pyes pour son kat kwen e kouver li avek bronz.

³ I ti fer tou bann istansil pour lotel: Bann basen, lapel, kalis, bol, fourset ek pti kastrol; tou sa bann istansil ti an bronz.

⁴ I ti fer en griyaz an bronz pour lotel, en kalite paswar ki i ti met anba rebor lotel, depi anba, ziska lanmwatye oter lotel.

⁵ I ti fer fonn kat bag ki i ti met lo kat kote sa griyaz an bronz, pour met bann bar.

⁶ I ti fer bann bar avek dibwa akasya e kouver avek bronz.

⁷ I ti met bann bar atraver bann bag lo bann kote lotel, pour transport lotel kan fodre. I ti fer li vid anndan avek bann plans.

⁸ I ti fer basen an bronz avek son sipor an bronz, bann laglas pour bann fanm ki ti fer zot servis devan lantre Latant Rankont.

Lakour Latant Rankont

⁹ I ti fer lakour: Pour kote Sid, ti annan bann rido an linenn fen trese, lo en longer 50 met,

¹⁰ avek zot 20 kolonn e 20 baz an bronz; bann krose pour bann kolonn ek zot bann treng ti annarzan.

¹¹ Lo kote Nor, ti annan bann rido 50 met longer avek zot 20 kolonn ek zot 20 baz an bronz; bann krose, bann kolonn ek zot bann treng ti annarzan.

¹² Lo kote Was, ti annan 25 met rido fikse avek 10 kolonn lo 10 baz; bann krose bann kolonn ek bann treng ti annarzan.

¹³ Lo kote Les, kot soley i leve, ti annan 25 met larzer.

¹⁴ Ti annan bann rido set met edmi lo en kote avek trwa kolonn ek trwa sipor.

¹⁵ Pour lot kote lantre, ti annan bann rido set met edmi lo lot kote avek zot trwa kolonn ek trwa sipor.

¹⁶ Tou bann rido ki ti antour lakour ti fer avek latwal linenn fen, trese.

¹⁷ Tou bann sipor pour bann kolonn ti an bronz; bann krose bann kolonn ek zot treng ti annarzan e latet bann kolonn ti kouver avek larzan. Tou bann kolonn lakour ti zwenn ansanm par bann treng annarzan.

¹⁸ Rido laport lakour ti ganny brode par en artizan. I ti kouler ble, rouz e rouz fonse, fer avek latwal linenn fen, trese: Dis met longer lo de met larzer lo sak kote, e de met edmi oter, parey larzer bann rido lakour.

¹⁹ Sa kat kolonn avek zot kat sipor ti an bronz; bann krose ek zot bann treng ti annarzan; latet bann kolonn ti kouver avek larzan.

²⁰ Tou bann pike pour lakour sanktyer e pour lakour toultour ti an bronz.

Metal pour Sanktyer

²¹ La lalis bann depans pour sanktyer, demer temwannyaz, ki ti ganny etabli lo lord Moiz, par bann levit, anba direksyon Itamar, garson pret Aaron.

²² Besalel, garson Ouri, garson Hour, sorti dan tribi Zida, ti fer tou sa ki SENYER ti'n ordonn Moiz.

²³ Avek li, ti annan Oholiab, garson Ahisamak, sorti dan tribi Dann, en skilpter e artis ki ti osi fer bann rido kouler ble, rouz, rouz fonse ek latwal linenn fen.

²⁴ Kantite lor ki ti'n ganny ofer dapre rityel, e ki ti ganny servi pour tou bann travay dan sanktyer, ti 877 kilo e 300 granm dapre valer sanktyer.

²⁵ Kantite larzan sorti kot bann manm kominote ki ti'n ganny konte dan resansman ti 3,017 kilo e 750 granm, dapre valer sanktyer.

²⁶ An tou, 603,550 zonm ki ti ganny konte dan resansman, aze 20 an e plis, ti donn sakenn 5 granm larzan, dapre valer sanktyer.

²⁷ An tou, 300 kilo larzan ti ganny fonn pour fer bann sipor sanktyer e baz bann rido. Sa i fer 30 kilo par sipor.

²⁸ 17 kilo e 750 granm ti servi pour fer bann krose ek bann treng pour bann kolonn e pour kouver bann latet.

²⁹ An tou 2,124 kilo bronz ti sorti dan bann lofrann rityel.

³⁰ Sa bronz ti servi pour fer bann baz pour lantre Latant Rankont, lotel an bronz ek son griyaz an bronz, e tou bann istansil pour lotel,

³¹ bann sipor pour toultour lakour, e pour laport lakour, tou bann pike pour Latant Rankont e pour toultour lakour.