Egzod 35 - Labib An Kreol Seselwa

Regleman pour Zour Saba

¹ Moiz ti rasanble pep Izrael antye. I ti dir zot, “La sa ki SENYER in donn lord fer:

² Travay ava ganny fer pandan sis zour; me setyenm zour pou en zour sakre, en saba, en zour repo pour SENYER. Sa enn ki travay sa zour pou ganny touye.

³ Zour saba, zot pa pou alim okenn dife kot zot reste.”

Bann Lofrann pour Latant Rankont

⁴ Moiz ti dir avek kominote Izrael antye: La sa ki SENYER in ordonnen:

⁵ Fer en kontribisyon pour SENYER lo sa ki zot annan. Tou dimoun ki annan en leker zenere, ava anmenn son don pour SENYER: Lor, larzan ek bronz;

⁶ lalenn ki'n tenn kouler ble, rouz, rouz fonse, latwal linenn fen ek pwal kabri;

⁷ lapo bouk tenn an rouz ek kwir fen; dibwa akasya;

⁸ delwil pour klere, bann lesans parfimen pour delwil lonksyon e pour lansan aromatize;

⁹ bann pyer korlalin ek lezot pyer presye pour garni lefod ek pektoral.

Materyo pour Latant Rankont

¹⁰ Tou bann artizan ki annan talan parmi zot, ava vin fer tou sa ki SENYER in komande:

¹¹ Sanktyer avek son latant ek son kouvertir, son bann zagraf, plan, travers, kolonn ek fondasyon;

¹² Kof Lalyans, son bann bar, kouvertir Kof Lalyans, ek rido separasyon;

¹³ latab, son bann bar, tou son bann akseswar ek dipen pour lofrann;

¹⁴ portlanp, son bann akseswar pour klere, bann lalanp ek delwil;

¹⁵ lotel lansan avek son bann bar; delwil lonksyon, lansan aromatize; rido pour lantre Latant Rankont

¹⁶ lotel pour sakrifis konplet, son griyaz an bronz, son bann bar ek tou bann akseswar; basen pirifikasyon avek son sipor;

¹⁷ bann rido pour lakour, son bann kolonn, son bann bar ek rido laport lakour;

¹⁸ bann pike sanktyer ek pike lakour avek zot lakord,

¹⁹ bann labiyman spesyal pour servi dan sanktyer, bann labiyman sakre pour pret Aaron e bann lenz ki son bann garson ava mete pour zot egzers zot minister.

Lepep I Anmenn Zot Lofrann

²⁰ Kominote Izrael antye ti sorti devan Moiz.

²¹ Sa bann ki ti annan leker byen dispoze e lespri zenere, ti vin anmenn zot kontribisyon pour SENYER, pour bann travay dan Latant Rankont, pour tou lezot servis e pour bann lenz sakre.

²² Zonm ek fanm ti vini; tou bann ki ti annan en leker zenere, ti anmenn swa bag nennen, zanno, bag, diferan lobze annor. Bann zonm ti ofer SENYER lor koman lofrann dapre bann rityel prezantasyon.

²³ Tou dimoun ti anmenn sa ki zot ti annan: Lalenn kouler ble, rouz, rouz fonse, linenn fen, lalenn pwal kabri, lapo bouk ek lapo kabri, lapo mouton tenn an rouz ek kwir fen.

²⁴ Sa ki ti'n fer en lofrann larzan oubyen bronz, ti osi anmenn son lofrann devan SENYER. Sa enn ki ti annan dibwa akasya ti anmennen pour fer tou bann travay.

²⁵ Tou bann fanm abil ti fer difil avek zot lanmen; zot ti anmenn sa difil ki zot ti'n fer e ki zot ti'n tenn kouler vyolet, rouz, rouz fonse, ansanm avek latwal linenn fen.

²⁶ Bann fanm avek talan, ti fer difil avek pwal kabri.

²⁷ Bann sef dan kominote ti anmenn bann pyer onyks ek lezot kalite pyer presye pour garni lefod ek pektoral.

²⁸ Zot ti osi anmenn bann parfen aromatik avek delwil pour lalanp, pour lonksyon e pour lansan parfimen.

²⁹ Tou zonm ek fanm ki ti annan en leker zenere pour kontribye dan tou bann travay ki SENYER ti'n ordonnen par lentermedyer Moiz, tou sa bann Izraelit, ti anmenn zot bann lofrann volonter pour SENYER.

Travayer pour Latant Rankont

³⁰ Moiz ti dir avek pep Izrael: SENYER in swazir Besalel, garson Ouri, garson Hour, ki sorti dan tribi Zida.

³¹ In ranpli li avek lespri Bondye e i'n donn li lasazes, disernman, konnesans pour fer tou kalite travay artizanal,

³² pour fer bann plan, pour travay avek lor, larzan ek bronz;

³³ pour tay bann pyer pour bann ornman, skilpte dibwa e toudsort travay artizanal.

³⁴ SENYER ti osi met dan leker Oholiab, garson Ahisamak sorti dan tribi Dann, talan pour ansennyen.

³⁵ In rann zot abil pour fer toudsort travay skilptir artizanal, brodri e tenn zot kouler ble, mov ek vyole, linenn fen e fer toudsort kalite travay.