Egzod 34 - Labib An Kreol Seselwa

Nouvo Plak Ros Komannman

¹ SENYER ti ordonn Moiz: Koup de plak ros parey sa de avan. Mon pou ekri lo zot, menm parol ki ti lo bann premye plak ki ou ti kase.

² Met ou pare demen bomaten. Ou ava vin lo montanny Sinai bomaten, ou ava prezant ou devan mwan lo latet montanny.

³ Personn pa devre vin avek ou; pa devre annan personn lo montanny. Fodre pa ki okenn zannimo, mouton, kabri oubyen bef, i vin manze pre avek sa montanny.

⁴ Alor, Moiz ti koup de plak ros parey sa de premye. I ti leve granmaten e al lo montanny Sinai parey SENYER ti'n ordonn li; i ti anmenn sa de plak ros dan son lanmen.

⁵ SENYER ti desann parmi bann nyaz e i ti debout akote Moiz. Moiz ti pro-klanm non SENYER:

⁶ SENYER ti pas devan li e proklanmen: Mwan menm SENYER, SENYER Bondye ranpli avek pitye ek konpasyon, pasyan, gran dan son fidelite ek lwayote;

⁷ ki gard son fidelite ziska mil zenerasyon; ki pardonn fot, dezobeisans ek pese. Me mon pa deklar inosan, sa enn ki koupab. Mon fer zanfan ek pti zanfan rann kont pese zot bann paran, ziska trwazyenm ek katriyenm zenerasyon.

⁸ Moiz ti vit bes son latet e prosternen.

⁹ I ti dir, “SENYER! Si vreman mon'n ganny ou faver, mon sipliy ou pour mars avek nou, akoz latet sa pep i dir. Ou pou pardonn nou, nou fot ek nou pese e aksepte nou koman ou posesyon.”

Renouvelman Lalyans

¹⁰ SENYER ti dir Moiz, “Mon pou fer en lalyans. Devan tou lepep, mon pou fer bann gran mervey ki zanmen in ganny fer lo later antye e parmi tou bann nasyon. Tou lepep otour ou ava war travay SENYER; mon pou akonpli bann mervey avek ou.”

¹¹ Ou ava obzerv tou sa ki mon ordonn ou ozordi: Mon pou sas devan ou bann Amorit, bann Kananeen, bann Hitit, bann Perizit, bann Hivit ek bann Zebizit.

¹² Fer sir ou pa fer okenn lalyans avek bann zabitan sa pei kot ou pe ale. Sa i kapab vin en pyez pour ou.

¹³ Ou ava detri zot bann lotel, kas zot bann pilye e koup zot bann ros sakre.

¹⁴ Ou pa devre ador okenn lot bondye, akoz non SENYER i Zalou! I en Bondye zalou.

¹⁵ Pa fer okenn lalyans avek bann zabitan sa pei, akoz si ou prostitye avek zot bann bondye e ofer zot bann sakrifis, zot ava kapab envit ou e manz sakrifis ki zot ofer zot bondye.

¹⁶ Zot ava osi fer ou garson marye avek zot bann fiy ki ava antrenn ou bann zanfan e fer zot prostitye avek zot bann bondye.

¹⁷ Ou pa devre fonn metal pour fabrik okenn bondye.

¹⁸ Ou ava obzerv lafet dipen san lelven. Pandan set zour, dan moman fikse, dan mwan bann zepi, ou ava manz dipen san lelven, parey mon ti ordonn ou, akoz ti pandan mwan bann zepi ki ou ti sorti Lezip.

¹⁹ Tou premye ne en manman i pour mwan, enkli tou mal premye ne dan ou troupo: Bef, mouton, kabri.

²⁰ Ou ava reaste premye ne en bourik kont en mouton. Si ou pa reaste li, ou ava kas son likou. Ou ava reaste tou premye ne parmi ou bann zanfan. Personn pa vin dan mon sanktyer lanmen vid.

²¹ Pandan sis zour ou ava travay, me setyenm zour, ou ava repoze. Ou ava fer saba menm pandan letan ki ou labour later e pandan larekolt.

²² Ou ava selebre lafet Lapannkot; lafet premye rekolt lorz e lafet larekolt alafen lannen.

²³ Trwa fwa par an, tou popilasyon mal ava prezant li devan SENYER, Bondye Izrael.

²⁴ Mon pou sas tou bann nasyon devan ou e mon pou agrandi ou teritwar; personn pa pou esey pran ou later ler ou ava al prezant ou devan SENYER ou Bondye trwa fwa par an.

²⁵ Ou pa pou ofer disan en sakrifis avek lelven e ou pa pou les lavyann sakrifis lapannkot reste ziska lannmen bomaten.

²⁶ Ou ava anmenn premye fri larekolt dan demer SENYER, ou Bondye. Ou pa pou kwi en pti kabri dan dile son manman.

²⁷ SENYER ti dir Moiz, “Ekri sa bann parol, akoz zot form labaz sa lalyans ki mon pou fer avek ou e avek Izrael.”

²⁸ Moiz ti reste avek SENYER pandan 40 zour, 40 nwit san manze, ni bwar. I ti ekri lo bann plak ros, bann parol lalyans: Dis komannman.

Moiz I Desann Sorti Montanny Sinai

²⁹ Moiz ti desann, sorti lo montanny Sinai. Ler i ti desann sorti lo montanny, sa de plak ros temwannyaz dan son lanmen, i pa ti remarke ki lapo son figir ki klate, akoz i ti pe koz avek Bondye.

³⁰ Ler Aaron avek tou bann Izraelit ti get Moiz, zot ti war ki lapo son figir ti briye; zot ti per pour apros li.

³¹ Moiz ti apel zot. Aaron ek tou bann responsab lakominote ti retourn kot li e i ti koz avek zot.

³² Apre, tou pep Izrael ti aprose e i ti fer zot konn tou bann komannman ki SENYER ti'n donn li lo montanny Sinai.

³³ Kan Moiz ti'n fini koz avek zot, i ti met en vwal lo son figir.

³⁴ Me kan Moiz ti al devan SENYER pour koz avek li, i ti tir sa vwal, ziska ki i ti retournen. Kan i ti retournen, e dir pep Izrael sa ki i ti ganny lord fer,

³⁵ bann Izraelit ti war figir Moiz ki ti pe briye. Moiz ti remet sa vwal lo son figir ziska ki i ti retourn koz avek SENYER.