Egzod 32 - Labib An Kreol Seselwa

Pti Toro Annor

¹ Bann Izraelit ti war ki Moiz ti pe tarde desann sorti lo montanny; zot ti rasanble otour Aaron. Zot ti dir li, “Fer pour nou, bann bondye ki mars devan nou. Annefe, nou pa konnen ki'n arive avek sa Moiz, sa zonm ki ti fer nou sorti Lezip.”

² Aaron ti dir zot, “Tir bann zanno lor ki dan zorey zot fanm, zot garson ek zot fiy, e anmenn kot mwan.”

³ Alor, tou dimoun ti tir zot zanno lor dan zot zorey e anmenn kot Aaron.

⁴ Avek tou sa lor ki i ti pran avek zot, Aaron ti fer fonn dan en moul pour fabrik en pti toro. Lepep ti kriye, “Izrael! La zot bann bondye ki'n tir zot dan Lezip.”

⁵ Kan Aaron ti war tousala, i ti konstri en lotel devan sa pti toro. I ti dir, “Demen pou annan en lafet pour SENYER.”

⁶ Tou dimoun ti leve lannmen granmaten. Zot ti ofer bann sakrifis konplet ek bann sakrifis lape. Lepep ti asize manze, bwar. Apre, zot ti leve pour anmize.

⁷ SENYER ti dir Moiz, “Desann toudswit. Sa pep ki ou ti fer sorti Lezip in koronpi.

⁸ Zot pa'n tarde pour sanz semen ki mon ti'n ordonn zot; zot in fer en pti toro annor. Zot in prostern devan li e ofer li sakrifis. Zot in dir: Izrael! La zot bann bondye ki'n tir zot dan Lezip.”

⁹ SENYER ti dir Moiz, “Mon'n war ki sa pep, i en pep antete.

¹⁰ Aprezan, les mwan entervenir; mon pou pran lakoler kont zot e mon pou ekstermin zot. Me ou, mon pou fer ou vin en gran nasyon.”

¹¹ Me Moiz ti sipliy avek SENYER, son Bondye, “SENYER akoz ou pran sa gran lakoler kont ou pep ki ou ti fer sorti Lezip avek gran pwisans e par ou lanmen for?

¹² Si ou fer sa, bann Ezipsyen ava dir: I ti annan lentansyon touy zot. Pour sa rezon ki i ti delivre zot, anmenn zot dan montanny e fer zot disparet lo later! Pez ou gran lakoler e renonse fer dimal ou pep.

¹³ Mazin Abrahanm, Izaak ek Izrael, ou bann serviter avek ki ou menm, ou ti fer en serman: Mon pou ogmant zot desandans parey zetwal dan lesyel; mon pou donn zot sa pei ki mon'n promet zot desandans pour touzour.”

¹⁴ Alor, SENYER pa ti fer dimal ki i ti'n dir i pou fer son pep.

¹⁵ Moiz ti redesann, sorti lo montanny avek sa de plak ros lo ki bann komannman ti'n ganny grave, devan e deryer.

¹⁶ Sa bann plak ros ti louvraz Bondye li menm. Lekritir ki ti'n grave lo sa de plak ros, ti lekritir Bondye.

¹⁷ Ler Zozye ti antann tapaz ki pep Izrael ti pe fer, i ti dir Moiz, “I annan tapaz lager dan kan pep Izrael.”

¹⁸ Me Moiz ti dir: Sa pa ni en tapaz laviktwar, ni en tapaz defet ki mon tande, me plito tapaz selebrasyon.

¹⁹ Ler i ti apros kan, i ti war sa pti toro e lepep ki ti pe danse. Alor, lakoler Moiz ti monte. I ti zet ater sa de plak ros komannman e kraz zot anba, devan montanny.

²⁰ I ti pran sa pti toro ki zot ti'n fer e zet li dan dife. I ti kraz li fen e fer li vin lapousyer ki i ti fann lo delo e fer pep Izrael bwar.

²¹ Moiz ti dir Aaron, “Ki sa pep in fer ou, pour ki ou'n fer en tel gran pese tonm lo li?”

²² Aaron ti reponn, “Pa bezwen ankoler mon senyer. Ou menm, ou konn sa pep: I anvi touzour fer sa ki mal.

²³ Zot ti dir mwan: Fer bann bondye ki ava diriz nou. Nou pa konnen ki'n arive avek Moiz, sa zonm ki'n fer nou sorti Lezip.

²⁴ Alor mon ti dir zot: Tir lo zot tou bann lobze annor ki zot annan. Zot ti donn mwan zot lor ki mon ti zet dan dife e ti sorti sa pti toro.”

Pinisyon

²⁵ Kan Moiz ti realize ki Aaron ti'n les lepep fer sa ki zot ti anvi e ekspoz zot avek zot lennmi,

²⁶ i ti debout devan lantre kan. I ti dir zot, “Sa bann ki lo kote SENYER vin kot mwan.” Tou bann garson Levi ti rasanble otour li.

²⁷ Moiz ti dir zot, “La sa ki SENYER, Bondye Izrael i deklare: Sakenn ava pran son lepe; i ava pas dan kan, devan sak laport atraver kan e touy zot frer, zot zanmi ek zot fanmir pros.”

²⁸ Bann garson Levi ti fer parey Moiz ti'n dir. Sa zour, zot ti touy anviron 3,000 zonm parmi lepep.

²⁹ Moiz ti dir, “Ozordi zot in ganny konsakre dan servis SENYER akoz zot pa'n ezite pour touy zot garson ek zot frer. Ki SENYER i akord zot son benediksyon ozordi.”

³⁰ Son lannmen, Moiz ti dir lepep, “Zot in komet en pese grav. Aprezan, mon pou mont kot SENYER lo montanny; kekfwa mon ava kapab fer li pardonn zot pese.”

³¹ Moiz ti retourn kot SENYER. I ti dir, “SENYER! Ou pep in komet en pese grav. Zot in fer en bondye annor pour zot.

³² Mon sipliy ou, oubliy zot pese. Sinon efas mon non lo ou Liv; sa enn ki ou'n ekri.”

³³ SENYER ti dir Moiz, “Sa enn ki son non pou ganny efase dan mon Liv, i sa enn ki'n fer pese kont mwan.

³⁴ Aprezan, ale! Al diriz mon pep dan sa landrwa ki mon'n dir ou. Mon lanz pour al par devan. Me zour mon pou entervenir, mon pou pini zot pour zot pese.”

³⁵ SENYER ti anvoy en fleo lo lepep akoz zot ti'n fer sa pti toro, sa enn ki Aaron ti'n fer.