Egzod 31 - Labib An Kreol Seselwa

Bann Travayer Sanktyer

¹ SENYER ti dir Moiz:

² Mon'n swazir Besalel, garson Ouri e pti zanfan Hour, sorti dan tribi Zida.

³ Mon'n ranpli li avek lespri Bondye, pour li ganny lasazes, disernman ek konnesans dan tou kalite travay.

⁴ I ava kapab fer bann travay artistik avek lor, larzan ek bronz.

⁵ I ava kapab tay bann pyer presye e fer travay skilptir lo dibwa ek tou kalite lezot travay.

⁶ Mon'n swazir Oholiab, garson Ahisamak, sorti dan tribi Dann, koman son asistan. Mon'n donn abilite ek talan bokou bann artizan, pour zot kapab fer tou sa ki mon'n ordonn ou:

⁷ Latant Rankont, Kof Lalyans, kouvertir pour Kof ek tou bann akseswar pour Latant Rankont,

⁸ latab avek son bann akseswar, lotel lansan,

⁹ lotel pour bann sakrifis konplet avek son bann akseswar, basen avek son sipor,

¹⁰ bann labiyman spesyal, bann labiyman sakre pour Aaron, bann labiyman pret pour son bann garson pour servi koman pret,

¹¹ delwil lonksyon ek lansan aromatik pour sanktyer. Zot ava fer egzakteman tou sa ki mon'n ordonn ou.

Saba

¹² SENYER ti dir Moiz:

¹³ Ou menm, koz avek pep Izrael: Sirtou zot devre obzerv mon bann saba, akoz sa i en siny ant mwan ek zot, zenerasyon apre zenerasyon, pour zot konnen ki mwan, SENYER, ki konsakre zot.

¹⁴ Zot ava obzerv saba, akoz i sakre pour zot. Sa enn ki pa gard li pou ganny touye. Sa enn ki travay zour saba ava ganny sase dan kominote.

¹⁵ Pandan sis zour zot ava travay; me setyenm zour i saba, konsakre pour SENYER. Sa enn ki travay zour saba ava ganny touye.

¹⁶ Pep Izrael ava obzerv saba; zot ava selebre saba dan tou zenerasyon koman en lalyans pour touzour.

¹⁷ Saba ava la koman en siny pour touzour ant mwan ek pep Izrael. Pandan sis zour, SENYER ti kree lesyel ek later; setyenm zour i ti arete e repoze.

¹⁸ Apre ki i ti'n fini koz avek Moiz lo montanny Sinai, Bondye ti donn li sa de plak an ros, bann komannman ki i ti'n ekri avek son ledwa.