Egzod 3 - Labib An Kreol Seselwa

Bondye I Apel Moiz

¹ Moiz ti pe gard troupo son boper, Zetro ki ti pret dan Madyann. I ti anmenn troupo lot kote dezer ziska Horeb, montanny Bondye.

² Lanz SENYER ti aparet avek li dan en laflanm dife, dan milye en zarbis. Moiz ti war ki sa zarbis ti anflanm, me i pa ti pe brile.

³ I ti dir, “Mon ava fer en detour e get sa fenomenn ekstraordiner: Akoz sa zarbis pa pe brile?”

⁴ SENYER ti war ki Moiz ti pe aprose pour war. Alor, Bondye ti apel li depi dan milye sa zarbis, “Moiz, Moiz!” I ti reponn, “La mon la.”

⁵ Bondye ti dir li, “Pa vin pli pre. Tir ou sandal dan ou lipye, akoz landrwa kot ou pe debout i en later sen.”

⁶ I ti azoute, “Mwan menm Bondye ou papa, Bondye Abrahanm, Bondye Izaak e Bondye Zakob.” Moiz ti kouver son figir akoz i ti per pour regard Bondye.

⁷ SENYER ti dir, “Mon'n byen war soufrans mon pep Lezip, e mon'n antann zot kriye anba kou bann sef latas. Mon konn zot soufrans.

⁸ Mon'n desann pour delivre zot dan lanmen bann Ezipsyen e fer zot sorti depi sa pei, ver sa bon pei ki gran, en pei kot dile ek dimyel i koule. Sa landrwa i kot bann Kananeen, bann Hitit, bann Amorit, bann Perizit, bann Hivit e bann Zebizit i reste.

⁹ Aprezan, leokri bann Izraelit in ariv ziska kot mwan e mon'n war ki mannyer bann Ezipsyen pe fer zot soufer.

¹⁰ Aprezan, ale. Mon pe anvoy ou kot Faraon; fer Izrael mon pep, sorti Lezip.”

¹¹ Moiz ti dir Bondye, “Ki mon ete mwan, pour al kot Faraon pour fer pep Izrael sorti Lezip?”

¹² Bondye ti dir li, “Mon pou avek ou. La siny ki se mwan ki anvoy ou: Kan ou ava'n fer pep Izrael sorti Lezip, zot pou vin ador Bondye lo sa montanny.”

Bondye I Revel Moiz Son Non

¹³ Moiz ti dir Bondye, “Si mon al kot pep Izrael e mon dir zot: Bondye zot zanset in anvoy mwan kot zot. Si zot demann mwan son non, ki mon pou reponn zot?”

¹⁴ Bondye ti dir Moiz, “Mwan menm Sa Enn ki la depi touzour. Dir bann Izraelit: Sa Enn ki egziste depi touzour in anvoy mwan kot zot.”

¹⁵ Bondye ti dir ankor avek Moiz: Ou ava dir bann Izraelit: SENYER, Bondye zot zanset Bondye Abrahanm, Bondye Izaak e Bondye Zakob ki'n anvoy mwan kot zot. Sa i ava mon non pour touzour, mon non ki bann zenerasyon fitir ava envoke.

¹⁶ Ale, e rasanble bann ansyen parmi pep Izrael e dir zot: SENYER, Bondye zot zanset, Bondye Abrahanm, Izaak ek Zakob in aparet avek mwan. I ti dir: Mon pe entervenir dan zot faver, akoz mon'n war tou sa ki pe arive avek zot, Lezip.

¹⁷ Alor, mon ti dir: Mon pou fer zot sorti Lezip kot zot pe soufer e anmenn zot dan pei bann Kananeen, bann Hitit, bann Amorit, bann Perizit, sa pei kot dile ek dimyel i koule.

¹⁸ Zot pou ekout ou. Ansanm avek bann ansyen parmi pep Izrael, ou ava al kot lerwa Lezip e dir li: SENYER, Bondye bann Ebre in revel li avek nou. Aprezan, nou demann ou permisyon pour fer en vwayaz trwa zour dan dezer pour nou ofer en sakrifis an loner SENYER nou Bondye.

¹⁹ Mwan mon konnen ki lerwa Lezip pa pou les zot ale, amwen ki i ganny forse par en lanmen solid.

²⁰ Mon pou servi mon lafors e pini Lezip avek toudsort aksyon ekstraordiner. Apre sa, i pou les zot ale.

²¹ Mon pou menm fer zot ganny faver bann Ezipsyen e kan zot ava ale, zot pa pou al lanmen vid.

²² Sak fanm ava demann son vwazen Ezipsyen e sa bann ki reste dan son lakaz, bann lobze annarzan, bann lobze annor ek bann lenz ki zot ava abiy zot garson ek zot bann fiy. Dan sa fason, zot ava depouy bann Ezipsyen.