Egzod 25 - Labib An Kreol Seselwa

Kontribisyon pour Sanktyer

¹ SENYER ti Koz avek Moiz:

² Dir pep Izrael fer en kontribisyon pour mwan, ki zot ava pran parmi bann zonm ki annan en leker zenere.

³ La kontribisyon ki ou pou demande lo sa ki zot annan: Lor, larzan, bronz,

⁴ lalenn ki'n tenn an ble, rouz kler e fonse, linenn fen, pwal kabri;

⁵ lapo kabri mal ki'n tenn rouz, kwir fen, dibwa akasya;

⁶ delwil pour bann lalanp, parfen pour delwil konsekrasyon e pour lansan aromatik;

⁷ korlalin ek lezot pyer presye pour garni lefod ek pektoral.

⁸ Zot ava konstri en sanktyer pour mwan, e mon ava reste parmi zot.

⁹ Zot ava konstri sanktyer ek bann lobze sakre, dapre model ki mon pou montre ou.

Kof Lalyans

¹⁰ Zot ava fer en kof avek dibwa akasya. I ava mezir 110 santimet longer, 66 santimet larzer, e 66 santimet oter.

¹¹ Ou ava kouver li avek lor pir anndan deor e ou ava fer en bordir annor toultour.

¹² Ou ava fer fonn kat bag annor ki ou ava atas avek son kat kwen, de bag lo sak kote.

¹³ Ou ava fer bann bar avek dibwa akasya, e ou ava kouver zot avek lor.

¹⁴ Ou ava pas sa bann bar dan sa bann bag ki dan kote Kof Lalyans, ki ava ganny servi pour anmenn Kof Lalyans.

¹⁵ Sa bann bar pou reste dan bann bag Kof Lalyans; fodre pa tir zot.

¹⁶ Ou ava met dan Kof Lalyans, plak temwannyaz ki mon pou donn ou.

¹⁷ Apre, ou ava fer en plak kouvertir annor pir, 110 santimet longer e 66 santimet larzer.

¹⁸ Ou ava fer de seriben annor ki'n ganny travay avek marto lo son de bout.

¹⁹ Ou ava fer en seriben lo sak bout sa kouvertir e fer zot en sel pyes avek plak kouvertir.

²⁰ Lezel bann seriben ava leve anler pour protez plak kouvertir. Zot ava ganny plase fas a fas; zot figir pou tourn ver en plak kouvertir Kof Lalyans.

²¹ Ou ava met sa plak kouvertir lo Kof Lalyans e ou ava met dan Kof, temwannyaz ki mon pou donn ou.

²² La kot mon pou rankontre ou; mon pou koz avek ou depi kouvertir Kof Lalyans, ant sa de seriben ki lo Kof Temwannyaz, pour mwan donn ou tou bann lord pour pep Izrael.

Latab Dipen Ofer Devan Bondye

²³ Ou ava fer en latab avek dibwa akasya, en met longer, 50 santimet larzer e 75 santimet oter.

²⁴ Ou ava kouver li avek lor pir e ou ava fer en bordir annor toultour.

²⁵ Ou ava fer en lankadreman annor, wit santimet larzer, ki ava fer en bordir toultour.

²⁶ Ou ava fer kat bag annor ki ou ava fikse lo kat kwen ki koresponn avek son kat lapat.

²⁷ Sa bann bag ki pou obor lankadreman, ava servi pour resevwar bann bar pour transport latab.

²⁸ Ou ava fer son bann bar avek dibwa akasya, kouver avek lor pir e ki pou ganny servi pour transport latab.

²⁹ Ou ava fer son bann pla, bann lakoup, resipyan pour delo ek bann bol pour lofrann diven. Zot ava annor pir.

³⁰ Lo sa latab ki ou ava plas dipen lofrann ki pou reste toultan devan mwan.

Portlanp

³¹ Ou ava fer en portlanp annor pir. Lipye ek son montan pou ganny fer avek lor ki'n ganny travay akoud marto, apartir en sel pyes. Son lipye ek son bann brans, son bann dekorasyon ek son bann bouton ava form en sel pyes.

³² I ava annan sis brans, trwa lo sak kote.

³³ Lo sak brans, i ava annan trwa lakoup an form fler kalis avek bouton ek petal. Sa i ava parey pour lezot sis brans ki sorti avek portlanp.

³⁴ Lo sa portlanp, i ava annan kat lakoup dan laform fler kalis avek bouton ek petal.

³⁵ I ava annan en fler anba son de premye brans, en bouton anba son de lot brans e en bouton anba de dernyen brans. Tou le sis brans portlanp ava parey.

³⁶ Bann bouton ek bann brans ava form en sel pyes; zot tou, zot ava ganny kouver avek lor pir.

³⁷ Ou ava fer son set lalanp; zot ava ganny plase dan en fason pour ki zot ekler devan.

³⁸ Ou ava fer son bann tennywar ek son bann sandriye annor pir.

³⁹ Ou ava pran 35 kilo lor pir pour fer portlanp ek son bann akseswar.

⁴⁰ Veye ki ou fer zot dapre model ki mon'n montre ou lo montanny.