Egzod 22 - Labib An Kreol Seselwa

Lalwa lo Konpansasyon

¹ Si en zonm i vol en toro oubyen en mouton, e touy li oubyen vann li, i ava pey an konpansasyon, senk toro pour en toro e kat mouton pour en mouton. Si i pa kapab, i ava ganny vann pour son vol.

² Si sa zannimo vole, swa toro oubyen mouton i vivan dan posesyon sa voler, i ava repey doub.

³ Si en voler i ganny pri pe kas lakaz, e i ganny bate anmor, sa pa devre ganny konsidere koman en mert.

⁴ Me si sa i ariv lizour, alor i ava ganny konsidere koman en krim.

⁵ Si en zonm i anmenn son troupo manz dan laplenn oubyen dan son plantasyon rezen, si i les bann zannimo al manz dan plantasyon en lot dimoun, i ava pey an konpansasyon, meyer prodwi son prop plantasyon, ek son prop plantasyon rezen.

⁶ Si en dife i pran e i fannen dan brousay; si i bril dible ki'n deza koupe oubyen ki pa ankor koupe, oubyen plantasyon antye, sa enn ki ti konmans sa dife ava pey en domaz.

⁷ Si en dimoun i donn son prosen larzan, oubyen bann lobze pour li garde, e sa bann lobze i ganny vole dan son lakaz; si sa voler i ganny atrape, i ava pey doub sa ki i'n vole.

⁸ Si sa voler pa ganny atrape, met sa lakaz ava prezant li devan Bondye pour deklare ki i pa'n vol dibyen son prosen.

⁹ Pour tou bann zafer malonnet konsernan bef, bourik, mouton, lenz oubyen nenport lobze perdi, kot enn i ganny akize, sa de parti ava prezant zot devan Bondye. Sa enn ki Bondye i deklar koupab, i ava pey son prosen doub.

¹⁰ Si en dimoun i donn son vwazen en bourik, en mouton, oubyen nenport zannimo, e sa zannimo i mor oubyen i ganny aksidan, oubyen i ganny vole san ki personn i war,

¹¹ sa zafer ant sa de parti ava ganny deside par en serman devan SENYER. Sa zonm ava deklare ki i pa'n vole. Propriyeter sa zannimo ava aksepte sa serman e lot pa pou annan okenn konpansasyon pour peye.

¹² Me si sa zannimo in ganny vole kot li, i ava pey son met en konpansasyon.

¹³ Si sa zannimo in ganny desire par en zannimo sovaz, i ava ganny anmennen koman levidans. I pa pou pey konpansasyon pour sa zannimo ki'n ganny desire par en zannimo sovaz.

¹⁴ Si en dimoun i demann pret en zannimo avek son prosen, e sa zannimo i ganny blese oubyen i mor dan labsans son met, i ava pey en konpansasyon.

¹⁵ Si sa ti ariv dan prezans propriyeter sa zannimo, i pa pou pey okenn konpansasyon; si sa zannimo ti'n ganny lwe, i ava pey zis larzan lokasyon.

Lalwa Moral ek Lalwa Relizye

¹⁶ Si en zonm i sedwir en vyerz ki pa ankor fiyanse e i dormi avek li, i ava pey fre maryaz tradisyonnel e marye avek li.

¹⁷ Si papa sa fiy i refize les son fiy marye, alor sa zonm ki'n sedwir sa vyerz, ava pey lekivalan annarzan, kado ki ganny peye pour kapab marye avek en fiy vyerz.

¹⁸ Ou pa pou permet en sorsye viv.

¹⁹ Sa enn ki dormi avek en zannimo ava ganny touye.

²⁰ Sa enn ki ofer sakrifis en lot bondye apard mwan, SENYER, ava ganny detri konpletman.

²¹ Fodre pa maltret ni kraz en etranze, akoz zot menm, zot ti bann etranze Lezip.

²² Ou pa devre maltret en vev, ni en orfelen.

²³ Si ou maltret zot e ki zot kriy ver mwan, sirman mon pou antann zot.

²⁴ Mon lakoler pou monte e mon pou masakre zot; zot bann fanm pou vin vev e zot bann zanfan pou bann orfelen.

²⁵ Si ou pret larzan en pov parmi mon pep, pa fer parey lezot dimoun ki pret larzan: Pa demann li okenn lentere.

²⁶ Si ou pran lenz ou vwazen an gaz, ou ava rann li avan soley kouse,

²⁷ akoz sa i son sel lenz pour kouver son lekor. Dan kwa ki i pou dormi? Si ou prosen i kriy ver mwan, mon pou antann, akoz mon annan konpasyon.

²⁸ Ou pa pou ensilte Bondye, ni maltret en dirizan ou pep.

²⁹ Fodre pa gard avek ou lofrann fri oubyen rekolt ek prodwi ou plantasyon rezen. Ou ava donn mwan premye ne parmi ou bann garson.

³⁰ Ou ava fer parey avek ou bef ek ou mouton: Zot ava reste set zour avek zot manman, e wityenm zour, zot ava anmenn li pour mwan.

³¹ Zot ava en pep konsakre pour mwan. Alor, zot pa pou manz lavyann okenn zannimo ki'n ganny desire par bann zannimo sovaz dan lakanpanny. Zot ava zet li avek bann lisyen.