Egzod 21 - Labib An Kreol Seselwa

Lalwa Konsernan bann Lesklav

¹ SENYER ti dir: La bann regleman ki ou ava met devan bann Izraelit:

² Kan ou aste en lesklav Ebre, i ava servi ou pandan sis lannen; setyenm lannen i ava reganny son laliberte, gratwitman.

³ Si i ti vin kot ou selibater, i ava al koman en selibater. Si i ti vin kot ou marye, son fanm ava al avek li.

⁴ Si son met ki ti'n donn li en fanm e ki sa fanm i ganny zanfan, sa fanm avek son bann zanfan ava reste pour son met; me sa lesklav ava al li tousel.

⁵ Si sa lesklav i deklare ki i kontan son met, son fanm ek son bann zanfan e ki i pa pou kit zot,

⁶ alor, son met ava anmenn li devan Bondye. I ava anmenn li kot montan laport e i ava pers son zorey avek en pwenson. Sa zonm ava vin son lesklav pour lavi.

⁷ Kan en zonm i vann son fiy pour fer li vin en lesklav, sa fiy pa pour reganny laliberte parey bann lesklav zonm.

⁸ Si i pa satisfer son met, i ava fer li ganny reaste. Son met pou napa drwa vann li avek en nasyon etranze, akoz i ava en traizon.

⁹ Si i donn sa lesklav son garson, i ava tret li dapre lalwa konsernan bann fiy.

¹⁰ Si i pran en dezyenm fanm, i devre kontinyen donn li menm kantite manze, lenz, ek tou bann menm drwa parey avan.

¹¹ Si sa trwa kondisyon pa ganny obzerve, sa lesklav ava kapab sorti san peye, san vers okenn larzan.

Lalwa Kont Vyolans

¹² Sa enn ki tap en zonm e touy li, i devre ganny touye.

¹³ Si i pa ti annan lentansyon touy li, me ki Bondye ki'n fer li tonm dan son lanmen, i ava kapab sov dan en landrwa ki mon pou dezinyen.

¹⁴ Me si dan lakoler, en zonm i atak en lot par riz e i touy li, ou ava aret li, menm akote mon lotel pour li ganny touye.

¹⁵ Sa enn ki tap son papa oubyen son manman ava ganny touye.

¹⁶ Sa enn ki vol en dimoun, ki i vann li, oubyen i gard li dan son posesyon, sa zonm ava ganny touye.

¹⁷ Sa enn ki ensilte son papa oubyen son manman ava ganny touye.

¹⁸ Si pandan en bagar ant de zonm, enn i tap lot avek en ros, oubyen i donn li en koudpwen e ki sa lot zonm pa mor, me i bezwen reste lo lili;

¹⁹ si apre, sa zonm i leve e i kapab marse deor avek en baton, sa zonm ki ti tap li ava ganny akize. Me i ava bezwen pey domaz pour letan ki sa lot zonm pa'n travay, e pey fre pour son gerizon.

²⁰ Si en zonm i tap son lesklav, zonm oubyen fanm, avek en baton e touy li, i ava ganny vanze.

²¹ Me si sa lesklav i viv pour en zour oubyen de, i pa pou ganny vanze, akoz sa zonm ti pour li.

²² Si dan en bagar parmi bann zonm en fanm ansent i ganny afekte, e son baba i ne avan son term san gran dimal, sa zonm ki ti tap li ava pey domaz ki mari sa fanm i demande, e ki ziz ava aprouve.

²³ Me si maler i arive, ou ava enpoz en lavi pour en lavi,

²⁴ en lizye pour en lizye, en ledan pour en ledan, en lanmen pour en lanmen, en lipye pour en lipye,

²⁵ en brile pour en brile, en kou pour en kou, en bate pour en bate.

²⁶ Si en zonm i tap son lesklav, zonm oubyen fanm, dan lizye, e sa lesklav i perdi son lizye, i ava rann li son laliberte an konpansasyon pour son lizye.

²⁷ Si i kas ledan son lesklav, zonm oubyen fanm, i ava rann li son laliberte an konpansasyon pour son ledan.

Responsabilite bann Propriyeter

²⁸ Si en toro i donn koud korn mortel en zonm oubyen en fanm, sa toro ava ganny saboule avek ros ziska i mor; personn pa pou manz son lavyann. Met sa toro pa pou responsab.

²⁹ Me si sa toro ti annan labitid donn koudkorn, e ki son met ti'n ganny averti, me i pa'n pran prekosyon; si sa toro i touy en zonm oubyen en fanm, i ava ganny saboule avek ros; son propriyeter osi ava ganny touye.

³⁰ Si i ganny forse pey en konpansasyon, i ava kapab viv si i pey sa sonm.

³¹ Menm regleman ava ganny aplike si en bef i tap en garson oubyen en fiy.

³² Si en bef i tap en lesklav, zonm oubyen fanm, son met ava donn met sa lesklav 30 pyes larzan e sa bef ava ganny saboule avek ros.

³³ Si en zonm i kit en pwi dekouver, oubyen si en zonm i fouy en pwi e i pa kouver li e si en bef oubyen en bourik i tonm ladan,

³⁴ propriyeter sa pwi ava pey en konpansasyon met sa zannimo e i ava gard sa zannimo mor pour li.

³⁵ Si bef en zonm i touy bef son vwazen, zot ava vann sa bef vivan, e partaz larzan; sa bef mor ava osi ganny partaze.

³⁶ Me si dimoun ti konnen ki sa bef ti annan labitid donn bann koudkorn, e son met pa'n pran prekosyon, i ava rann en bef vivan an konpansasyon, e gard sa enn mor pour li.