Egzod 20 - Labib An Kreol Seselwa

Dis Komannman

¹ La bann parol ki Bondye ti dir avek pep Izrael:

² Mwan menm SENYER ou Bondye, ki ti delivre ou Lezip dan lesklavaz.

³ Ou pa pou annan okenn lezot bondye apard mwan.

⁴ Ou pa pou fer okenn stati, nanryen ki annan laform okenn keksoz ki lao dan lesyel, oubyen anba lo later, oubyen ki dan delo ki pli ba ki later.

⁵ Ou pa pou azenou devan zot e ou pa pou ador zot. Annefe, mwan SENYER ou Bondye, mon en Bondye zalou. Mon pini bann zanfan pour pese zot papa ziska trwazyenm ek katriyenm zenerasyon bann ki ay mwan.

⁶ Me mon pou montre mon fidelite ziska mil zenerasyon, anver bann ki kontan mwan e ki gard mon bann komannman.

⁷ Ou pa pou pronons non SENYER ou Bondye an bonnavini. Annefe SENYER pa pou pardonn sa enn ki pronons son non an bonnavini.

⁸ Rapel zour saba; gard li koman en zour sakre.

⁹ Pandan sis zour, ou ava travay, e ou ava fer tou ou lou-vraz.

¹⁰ Me setyenm zour i saba rezerve pour SENYER, ou Bondye. Sa zour, ou pa pou fer okenn travay, ni ou, ni ou garson, ni ou fiy, ni ou serviter, ni ou servant, ni ou bann zannimo, ni okenn etranze ki reste dan ou bann lavil.

¹¹ Annefe, pandan sis zour, SENYER ti fer lesyel ek later, lanmer e tou sa ki ladan; setyenm zour i ti repoze. Pour sa rezon, SENYER ti beni zour saba e i ti konsakre li.

¹² Ou pou annan respe pour ou papa ek ou manman; konmsa, ou ava viv lontan lo sa later ki SENYER, ou Bondye i donn ou.

¹³ Ou pa pou komet okenn mert.

¹⁴ Ou pa pou komet adilter.

¹⁵ Ou pa pou vole.

¹⁶ Ou pa pou donn okenn fo temwannyaz kont ou prosen.

¹⁷ Ou pa pou anvi lakaz ou prosen; ou pa pou anvi fanm ou prosen, ni son serviter, ni son servant, ni son bef, ni son bourik, ni okenn keksoz ki pour ou prosen.

Lafreyer Lepep

¹⁸ Tou lepep ti antann loraz, zekler, son tronpet; zot ti war lafimen lo montanny. Lepep ti war; zot ti tranble e zot ti debout, lwen.

¹⁹ Zot ti dir Moiz, “Ou, koz avek nou e nou ava ekoute. Me fodre pa ki Bondye i koz avek nou, sankwa nou pou mor.”

²⁰ Moiz ti dir lepep, “Pa bezwen per, akoz Bondye in vin teste zot pour ki zot ava annan respe pour li e pa fer pese.”

²¹ Lepep ti debout lwen pandan ki Moiz ti apros kot Bondye ti ete dan sa nyaz epe.

Lalwa Konsernan bann Lotel

²² SENYER ti dir Moiz, “La sa ki ou pou dir pep Izrael: Zot in war zot menm ki depi lesyel, mon'n koz avek zot.

²³ Zot pa pou fer okenn bondye annarzan oubyen annor. Zot pa pou ador bann bondye apard mwan.

²⁴ Ou ava fer mwan en lotel avek later. Lo la, ou ava ofer zannimo koman sakrifis konplet ek sakrifis lape, bann mouton, bef ek kabri. Partou kot ou ava envok mon non, mon pou vin kot ou e mon pou beni ou.

²⁵ Si ou fer en lotel an ros, pa bezwen fer li avek ros taye, akoz ou zouti pou rann li enpir.

²⁶ Ou pa pou mont kot mon lotel par mars peron, pour ki ou touni pa ganny ekspoze.”