Egzod 2 - Labib An Kreol Seselwa

Nesans Moiz

¹ En zonm sorti dan lafanmir Levi ti marye avek en fanm sorti dan menm tribi.

² Sa fanm ti tonm ansent e donn nesans en garson. Ler i ti war ki ti en zoli baba, i ti kasyet li pandan trwa mwan.

³ Kan i ti nepli kapab kontinyen kasyet son pti baba, i ti pran en pannyen fer avek zon ki pous dan lanmar e kouver avek goudron. I ti met son pti baba ladan e depoz parmi bann fouzer zon obor larivyer Nil.

⁴ Ser sa pti baba ti debout en pe pli lwen. I ti veye sa ki pou arive avek li.

⁵ Fiy Faraon ti vin bennyen dan larivyer Nil, pandan ki son bann servant ti'n al marse lo bor larivyer. I ti war en pannyen parmi bann zon. I ti anvoy enn son bann servant anmas sa pannyen.

⁶ Kan i ti ouver sa pannyen, i ti war en pti baba: En pti garson ki ti pe plere. I ti oule sov li, me i ti dir, “Sa en pti baba bann Ebre.”

⁷ Alor, ser sa pti baba ti dir fiy Faraon, “Eski ou oule mon al rod en nouris parmi bann fanm Ebre pour donn tete sa pti baba pour ou?”

⁸ Fiy Faraon ti dir li, “Wi, ale.” Alor, sa zenn fiy ti al apel manman sa pti baba.

⁹ Fiy Faraon ti dir li, “Pran sa pti baba e donn li tete pour mwan; mon ava pey ou.” Alor sa fanm ti pran swen sa pti baba e donn li tete.

¹⁰ Ler sa pti baba ti'n grandi, i ti anmenn li kot fiy Faraon ki ti pran li koman son garson. I ti apel li Moiz, akoz, i ti dir: Mon'n tir li dan delo.

Moiz I Sov dan Pei Madyann

¹¹ En zour, kan Moiz ti'n gran, i ti al kot son bann frer Ebre e i ti war zot dan zot latas travoforse. I ti war en Ezipsyen pe bat en Ebre, enn son bann frer.

¹² I ti get otour li e ler i ti war napa personn, i ti touy sa Ezipsyen e kasyet li dan disab.

¹³ Son lannmen, i ti sorti ankor e i ti war de Ebre ki ti pe lager. I ti dir avek sa zonm ki ti annan tor, “Akoz ou bat ou frer?”

¹⁴ Sa zonm ti reponn, “Lekel ki'n apwent ou sef e ziz lo nou? Eski ou annan lentansyon touy mwan parey ou ti touy sa Ezipsyen?” Moiz ti per; i ti dir dan li menm: Dimoun in konnen sa ki mon'n fer.

¹⁵ Kan Faraon ti aprann sa ki ti'n arive, i ti rod fason pour touy Moiz. Me Moiz ti sove. Pour li sape dan lanmen Faraon, i ti al etabli li dan pei Madyann. La i ti al asiz obor en pwi.

¹⁶ Pret Madyann, ti annan set fiy. Zot ti vin sers delo pour ranpli bann loz e fer bwar troupo zot papa.

¹⁷ Me ler bann berze ti arive, zot ti sas sa bann fiy. Alor, Moiz ti leve, defann zot e donn delo zot troupo.

¹⁸ Ler zot ti retourn dan lakour, zot papa Rouel ti demann zot, “Akoz zot in retourn boner ozordi?”

¹⁹ Zot ti reponn, “En Ezipsyen in delivre nou kont bann berze; in menm al rod delo pour nou e fer bwar nou troupo.”

²⁰ Rouel ti demann son bann fiy, “Oli sa zonm? Akoz zot in les li laba? Apel li, envit li isi, pour manz avek nou.”

²¹ Moiz ti aksepte pour reste kot sa zonm ki ti donn li son fiy Sefora.

²² I ti donn nesans en garson ki i ti apel Gersonn, savedir etranze. I ti dir: Mon en refizye dan en pei etranze.

²³ Lontan apre, lerwa Lezip ti mor. Bann Izraelit ti kontinyen plennyen anba lesklavaz. Zot bann plent dan zot leta lesklavaz ti mont ver Bondye.

²⁴ Bondye ti antann zot soupir. I ti rapel son lalyans ki i ti'n fer avek Abrahanm, Izaak ek Zakob.

²⁵ Bondye ti regard bann Izraelit e i ti konpran.