Egzod 19 - Labib An Kreol Seselwa

Bann Izraelit devan Montanny Sinai

¹ Pep Izrael ti ariv dan dezer Sinai, trwazyenm nouvellin, apre ki zot ti'n kit Lezip.

² Kan zot ti kit Refidim e ariv dan dezer Sinai, zot ti kanp lanmenm devan montanny Sinai.

³ Moiz ti mont kot Bondye e SENYER ti apel li lo montanny. I ti dir li, “La sa ki ou pou dir desandan Zakob ek pep Izrael:

⁴ Zot in war sa ki mon ti fer avek Lezip: Mon ti anmenn zot, parey en leg i anmenn son piti lo son lezel, e mon'n fer zot retourn kot mwan.

⁵ Apartir ozordi, si zot ekout mwan e gard mon lalyans, zot pou vin mon prop posesyon parmi tou bann pep. Later antye i pour mwan.

⁶ Zot ava vin en rwayonm pret e en nasyon sen pour mwan. Sa i bann parol ki ou pou dir avek zanfan pep Izrael.”

⁷ Alor, Moiz ti retournen e apel bann ansyen parmi pep Izrael, e i ti dir zot tou bann parol ki SENYER ti ordonn li.

⁸ Lepep antye ti reponn ansanm, “Nou pou fer tou sa ki SENYER in dir.” Moiz ti raport avek SENYER tou sa ki lepep ti'n dir.

⁹ SENYER ti dir Moiz, “Mon pe vin kot zot dan en nyaz epe, pour ki lepep ava kapab ekoute kan mon koz avek ou e pour ki zot ava krwar ou pour touzour.” Moiz ti dir SENYER tou sa ki lepep ti'n dir li.

¹⁰ SENYER ti dir Moiz, “Al kot ou pep e dir zot pirifye zot ozordi ek demen, e fer zot lav zot lenz.

¹¹ Zot ava met zot pare pour trwazyenm zour, akoz trwazyenm zour, SENYER pou desann lo montanny Sinai devan lepep antye.

¹² Ou ava demark bann limit otour montanny e ou ava dir zot fer atansyon ki zot pa tous montanny. Sa enn ki tous montanny pour ganny touye.

¹³ Personn pa pou tous sa dimoun koupab, me i ava ganny saboule avek ros oubyen fles. I kapab en zannimo oubyen en zonm; me i pa pou reste vivan. Kan zot ava antann tronpet soufle, zot ava vin kot montanny.”

¹⁴ Alor Moiz ti desann sorti lo montanny. I ti konsakre lepep e zot ti lav zot lenz.

¹⁵ I ti dir zot, “Met zot pare pour trwazyenm zour e pa bezwen ganny relasyon seksyel avek zot bann fanm.”

¹⁶ Bomaten, trwazyenm zour, ti annan loraz, zekler ek en nyaz epe lo montanny. Apre, ti annan en son tronpet byen for e tou dimoun dan kan ti tranble avek lafreyer.

¹⁷ Apre, Moiz ti anmenn lepep an deor kan pour en rankont avek Bondye, e zot ti debout devan montanny.

¹⁸ Montanny Sinai ti kouver avek lafimen, akoz SENYER ti'n desann dan en dife. Lafimen ti monte parey lafimen sorti dan en four e montanny antye ti tranble.

¹⁹ An mezir ki son tronpet ti vin pli for, Moiz ti koze e Bondye ti reponn li dan loraz.

²⁰ SENYER ti desann lo latet montanny Sinai, e i ti apel Moiz lo latet montanny. Moiz ti monte.

²¹ SENYER ti dir Moiz, “Desann e averti lepep pour ki zot pa vin tro pre avek SENYER pour vin gete. Sankwa bokou pou mor.

²² Bann pret ki vin devan SENYER ava pirifye zot, pangar ki SENYER i pini zot e ki i annan parmi zot ki mor.”

²³ Moiz ti dir SENYER, “Lepep napa drwa mont lo montanny Sinai, akoz ou menm, ou ti averti nou pour fikse en limit otour montanny pour gard li sakre.”

²⁴ SENYER ti dir li, “Desann, apre, ou ava remont avek Aaron. Me bann pret ek lepep pa devre depas balizaz pour vin kot SENYER, pangar serten parmi zot i mor.”

²⁵ Alor, Moiz ti desann kot lepep e dir zot tou sa ki SENYER ti'n dir li.